Gebede Vir Elke Vrou 1o1i56

GEBEDE vir elke vrou

Nina Smit

Lux Verbi

Here, dankie vir die voorreg om ’n vrou te kan wees. Vir die baie vreugdes wat dit kan bring – die liefde van ’n lewensmaat, die afhanklikheid van kinders. Help my asseblief om elke dag my verantwoordelikhede as vrou met vreugde na te kom: om ’n tuiste te skep; om my dierbares te versorg en my huis netjies te hou. Gee dat ek ook in my buurt en gemeente my rol as vrou sal vervul deur van my talente en van myself te gee. Dankie dat ek weet die hoogste vervulling van my vrouwees lê in my liefde vir U.

Voorwoord

Ek roep tot U, o God, want ek weet U sal antwoord. Buig af en luister as ek bid. Psalm 17:6 NLV

Jou Bybel verseker jou op baie plekke dat God hoor en antwoord wanneer sy kinders bid. Hoe meer ’n mens met iemand praat en hoe langer jy in daardie persoon se teenwoordigheid deurbring, hoe beter leer jy hom of haar ken. Dieselfde is waar van God. Jy kan God nie werklik persoonlik ken as jy nie dikwels in gebed met Hom praat nie. Jy moet ook leer om die dinge wat in jou hart leef na God te bring. Nie net belangrike sake nie, maar ook die klein, alledaagse dinge wat deel uitmaak van jou lewe. God is elke oomblik van die dag vir jou beskikbaar, en as jou woorde ontoereikend is, onderneem die Heilige Gees om in jou plek te bid en jou stamelende gebede reguit na God te neem. Jy mag maar met groot vrymoedigheid na God se genadetroon gaan omdat Jesus reeds vir jou daardie voorreg aan die kruis verdien het. Onthou net dat jy ook tyd moet inruim om na God te luister. Só kan jy vir God elke oomblik van die dag by jou hê. ’n Mens leer bid deur te bid. Dit is my gebed dat die gebede in hierdie bundel byval in jou omstandighede sal vind, sodat dit vir jou makliker sal wees om jou eie gebedsversoeke na God te bring.

NINA SMIT

Menswees

Christelike leefwyse Tydsbesteding Lofprysing Danksegging Vreugde Vriendskap Siekte

Christelike leefwyse

Hemelse Vader, vergewe my asseblief al my sondes en maak my gewillig om dié mense wat teen my oortree het, én myself te vergewe. Ek wil graag absoluut gehoorsaam wees aan die riglyne in u Woord. Leer my hoe ek U en ander mense moet liefhê, en leer my ook om U elke dag van my lewe te loof en te aanbid. Seën asseblief die werk waarmee ek besig is en help my om dit na die beste van my vermoë te doen. Maak my vrugbaar in u koninkryk, maak my rein en heilig sodat u Heilige Gees van nou af my lewe sal beheer. Wys my asseblief die spesifieke doel waarvoor U my geskep het, en seën elkeen van my verhoudings. Laat u wil in my lewe geskied, beskerm my teen gevare en gee vir my die nodige wysheid om die regte keuses te maak en die regte besluite te neem. Verlos my asseblief van die Bose en red my van negatiewe emosies wanneer dit moeilik gaan. Vertroos my in hartseertye, laat my sterk wees teen versoekings, genees my as ek siek is en bevry my van vrees. Gebruik my om ander mense se lewe positief aan te raak en hulle te bemagtig met my woorde. Versterk my geloof, Here, maak my meer soos Jesus, en help my om nie langer oor my foute van die verlede te tob nie. Stap nou elke dag saam met my op my lewenspad tot op dié dag wanneer U my kom haal om vir altyd by U te wees. Ek vra dit in die Naam van Jesus.

Here, dankie vir die wysheid in Spreuke wat my leer hoe ek moet leef. Ek weet nou dat as ek U liefhet, ek nooit bang hoef te wees nie; dat ek bewustelik mag kies om gelukkig te wees deur u voorskrifte te gehoorsaam. Leer my asseblief om te dink voor ek praat, om met my hele hart op U te vertrou, om U met my gawes te dien, om reg te dink en reg te leef, en om die mense wat my hulp nodig het dadelik te help. Bewaar my asseblief sodat ek veilig kan leef en rustig sal slaap. Vergewe my dat ek nog so maklik lyf wegsteek – van nou af wil ek graag my werk vir U doen. Skenk my u wysheid om moeilike situasies reg te hanteer en gee vir my die kennis en insig wat ek nodig het.

Ek wil meer tyd maak vir U, meer tyd met u Woord deurbring sodat ek u riglyne my eie kan maak en daarvolgens kan leef. Help my om my praatlus hok te slaan, om nie van ander te skinder nie en gee vir my ’n oop hand vir ander. Van nou af wil ek uit my foute leer en ophou om my te bekommer. Dankie dat my vreugde soos ’n helder lig mag skyn omdat ek aan U behoort. Ek loof U dat ek u liefde soos ’n borrelende fontein in my lewe mag beleef, en dat ek selfs wanneer U my geloof toets deur swaarkry steeds aan U mag vashou. Maak my ’n ware vriend vir my vriende; nederig en absoluut afhanklik van U, en leer my om na U en ander te luister – maar bo alles om onvoorwaardelik lief te hê, soos U my liefhet.

Ag Here, ek sukkel so met die liefde!

Dis maklik om die mense na aan my lief te hê en na hul belange om te sien.

Maar dié mense wat van my verskil, wat anders dink as ek, wat my irriteer en omkrap – vir hulle probeer ek tevergeefs benader met die liefde wat U van my vra.

Ek sien nou ek kan dit nie regkry nie, en kom vra dat U dit asseblief vir my moontlik sal maak om my liefde vir U oor te skakel na liefde vir ander en dit in dade om te sit.

Here, ek onderneem om dit te waag om lief te hê.

Maak my liefde onselfsugtig en oorvloedig soos u liefde vir my. Gee dat ek dit sal regkry om my voorkeure en wense prys te gee ter wille van ander.

Stort asseblief u onvoorwaardelike liefde in my hart uit deur die Heilige Gees wat in my woon sodat my hele lewe van nou af in die teken van die liefde sal staan.

Gees van God, ek weet baiekeer nie wat om te bid nie. Sal U my asseblief leer en vir my intree? Ek word skaam as ek dink hoe lank en hoe hard ek al vir u gewerk het – só lank en só hard dat daar nie tyd was om te bid nie. Dankie dat U my wil leer dat gebed soveel meer kan verrig as wat harde werk kan; dat, wanneer ’n nietige mensekind bid, die almagtige God in beweging kom. Leer my van nou af om éérs te bid voordat ek dinge probeer doen. Dankie dat U magtig is om baie meer te doen as waarvoor ek kan vra.

Here, dankie vir u oorvloedige seën wat ek elke dag in my lewe ervaar. Wys vir my hoe ek ander kan seën.

Here, ek bely dat ek so dikwels stilbly wanneer ek oor U moet praat. Dankie vir die voorreg om u getuie tussen ander mense te wees, en vir die versekering dat U my vashou en beskerm.

Vader, ek bely dat my entoesiasme vir U maklik verflou, dat my energie by die dag minder raak. Vergewe my hierdie traagheid en gee my weer ’n standhoudende ywer vir u koninkryk.

Hemelse Vader, ek bid dat U my sal help om weg van myself te kyk, en my oë op U gerig te hou, om te onthou hoe U my in die verlede gehelp het, en om my hand na ander uit te steek om hulle te help.

Hemelse Vader, soos so dikwels tevore staan ek skuldig voor U. Ek is so gou om na U te hardloop met al my probleme. Om oplossings by U te soek as sake vir my te warm begin word. Dankie dat U my vandag daarop wys dat daar ook vir gebed voorbereiding nodig is.

Wys asseblief my sonde aan my uit. Maak my sensitief vir alles wat ek verkeerd doen – en help my om die sonde te laat staan wat skeiding tussen U en my bring.

Dankie dat U in u Woord belowe om my sonde te vergewe as ek dit bely. Dankie dat ek vry is om na u genadetroon te kom met die seker wete dat U my liefhet, dat U sal luister en antwoord.

Hemelse Vader, baie dankie vir elke belofte wat in u Woord opgeteken is: dat U my sal help en bewaar, dat U my liefhet en in elkeen van my behoeftes sal voorsien; dat U my sal dra in swaarkrytye en vir my sal sorg.

Help my om die beloftes in my Bybel te memoriseer, aan te teken en my eie te maak.

Dankie dat ek seker mag weet dat U getrou bly aan u beloftes, dat U uiteindelik elkeen van hulle waar sal maak, mits ek bereid is om te wag vir u tyd en tevrede sal wees met die manier waarop U die beloftes vervul.

Dankie dat ek U ook aan u beloftes mag herinner op dié tye wanneer ek moedeloos word omdat dit vir my voel dat U talm om te antwoord.

Ek weet, Here, dat elkeen van hierdie beloftes absoluut betroubaar is.

Ek bid vir dié mense wat ek ken en liefhet, vir my kinders en kleinkinders, my familie en vriende – dat U elke dag vir hulle sal onderneem en in al hul behoeftes sal voorsien.

Ek bring ook my gemeente, die dorp waar ek woon en my land na U toe, en ek dra almal wat besig is om vir U te werk aan U op.

Ek bid vir die leiers in ons land en die regering, gee hulle die nodige wysheid om reg te regeer.

Ek wil ook vir dié mense bid van wie ek nie hou nie; leer my om hulle lief te kry.

En vir hulle van wie ek in die koerante lees en oor die televisienuus hoor – mense wat rampe en trauma beleef en mense wat dierbares verloor het.

Wees U tog by elkeen van hulle, Here, en omvou hulle met u liefde.

Dankie vir die ontdekking dat wanneer ek vir ander bid, ek ook vir hulle lief raak en hulle al hoe beter verstaan.

Ek loof U dat U my voorgaan in hierdie voorbidding omdat U reeds vir my by God intree.

Hemelse Vader, dis nie so maklik om in U te bly glo wanneer my geloof om elke hoek en draai getoets word nie, wanneer my gebede onbeantwoord bly en ek in die diepte van depressie verval nie. Dit is nog moeiliker om te glo wanneer ek keer op keer teleurgestel word wanneer ek vas glo, wanneer die beloftes waaraan ek vashou nie vir my persoonlik waar word nie.

Here, help my dat ek nie in U sal begin twyfel nie. Gee dat ek sal vashou aan u beloftes en sal wéét: Vir U is niks onmoontlik nie. Dankie vir die één ding wat die vreugde weer in my laat roer: die feit dat U eendag weer sál kom om vir altyd ’n einde te maak aan alle ellende.

Leer my weer dat álles moontlik is vir dié een wat glo. U weet tog dat ek U liefhet en in U glo. Help my waar ek nog ongelowig is. Ek wil nou volledig terugstaan en U toelaat om vir my in te staan.

Hemelse Vader, in die tyd wat verby is, kon ek antwoorde op sommige van my waarom-vrae kry. Ek weet nou dat ek U volkome kan vertrou, dat U my sal help om soos U te vergewe, dat ek nie met my belasting mag kul of my bydraes mag afskeep nie.

Dankie vir my Bybel wat my wys hoe om te leef. Alhoewel die lewe nie altyd regverdig is nie, weet ek dat Ú is, dat U my liefhet en my lank tevore gekies het om u kind te wees.

Dankie dat U daar is wanneer ek swaarkry; help my om aardse swaarkry te verdra en wys my wat u wil vir my lewe is. Ek loof U dat ek goed genoeg vir U is, dat U my na u beeld geskep het en dat U in beheer is, ongeag die toestand van die wêreld om my.

Maak dit vir my moontlik om u getuie te wees wanneer ek siek is, help my om my Sondae vir U opsy te sit en vrede met my verlede te maak. Ek loof U dat U weer sal kom en dat ek nou al seker mag wees dat my plek in die hemel reeds vir my wag.

Hemelse Vader, vergewe my dat ek U so bly peper met my baie waarom-vrae, dat ek, soos Job en Dawid, kitsantwoorde van U wil hê. Leer my opnuut dat U almagtig is, dat U my nie ’n antwoord skuld nie, dat ek juis met hierdie vrae u liefde blokkeer sodat dit nie by my kan uitkom nie.

Dankie vir die versekering dat dié dinge waaroor ek so baie vrae het onlosmaaklik deel van u plan vir my lewe is en dat dit my uiteindelik wil lei tot ’n vars, nuwe ontdekking van u mag en majesteit.

Vader, ek wil nou al hierdie vrae los en net op U bly fokus – U wat volmaakte liefde is.

Laat my elke môre opnuut bewus word van u liefde.

Wys my die pad wat ek moet loop, want my hoop is op U gevestig.

Dankie dat ek nie meer vrae het wanneer ek op U konsentreer nie omdat ek weet dat Uself die antwoord is.

Here Jesus, daar is so baie dinge in die lewe wat vir my belangrik is: sekuriteit, ’n mooi huis, modieuse klere, geleerdheid, geluk, gesondheid en nog baie ander. Vergewe my dat ek my so moeg maak om daardie dinge my eie te kan noem.

Dankie dat U my weer vandag kom wys op die heel belangrikste: om U te mag ken.

Leer my van nuuts af dat niks werklik die moeite werd is sonder U nie.

Dankie vir die voorreg om u kind te kan wees, om te deel in u liefde en u genade.

Help my om altyd te onthou dat niks in my lewe belangriker mag wees as U nie.

Gee dat U vir my altyd eerste sal kom sodat ek soos Paulus kan sê – en dit werklik bedoel – dat om te leef vir my Christus is, en om te sterf vir my ’n wins.

Here Jesus, dankie dat U na die aarde gekom het sodat ons kan weet hoe groot God se liefde vir sondaars is.

Dankie dat Uself Liefde is – dat U ons eerste liefgehad het sodat ons in u liefde kan bly. Leer ons asseblief om mekaar – en vir U – lief te hê met die volmaakte liefde wat van U af kom.

Vergewe ons dat ons in ons strewe na materiële welvaart en sosiale aansien tevrede is om met die minimum liefde klaar te kom.

Vergewe ons dat ons mekaar nie kan verdra nie; dat ons jaloers en perfeksionisties is; mekaar wantrou en weier om mekaar te vergewe. Leer ons dat die liefde die héél belangrikste is omdat dit vir altyd bly.

Here Jesus, ek wil graag met my hele lewe bewys dat ek ’n Christen is. Maak dit vir my moontlik om U bo alles lief te hê, ander mense bo myself te stel, heilig in die wêreld te leef en absoluut gehoorsaam aan die riglyne in u Woord te wees. U maak dit vir my moontlik om God se kind en erfgenaam te mag wees, om nuut te leer dink, en om my gawes tot u eer te gebruik. Help my om al hoe nader aan U te leef sodat my geloof al hoe sterker sal word en my verhouding met U elke dag sal verinnig. Ek wil my aan U toewy deur al hoe meer soos U te word, u wil te doen en met die sonde te breek.

Dankie vir die geskenk van die Heilige Gees wat in my woon en my daagliks leer en lei. Maak my ’n helder spieël wat u heerlikheid sal weerkaats, en gee vir my ’n sendingvisie sodat ek ander mense van U sal vertel. Van nou af wil ek U eerste stel en alle ander dinge ter wille van U prysgee; ek wil leef met die innerlike blydskap wat van U kom; in u Naam met God praat en in U bly.

Dankie dat ek dit met u hulp sal kan regkry om my seerkry en swaarkry positief te verwerk, om in alle omstandighede meer as ’n oorwinnaar te wees en steeds moed te kan hou omdat U my spesiaal uitverkies het om U s’n te wees. Maak my gewillig om te vergewe, met wysheid te leef en my lewe toe te wy aan die goeie dade waarvoor U my gemaak het. Baie dankie dat ek reeds die ewige lewe hét en dat ek mag uitsien na ’n ewigheid saam met U.

Here Jesus, ek besef opnuut dat U my wil nuut maak, dat my geloof die ewige lewe vir my waarborg en my van ontsteltenis vrywaar. Maak my gewillig om sout en lig vir die wêreld te wees en my vyande lief te hê. Dankie vir die versekering dat ek nooit weer bang of bekommerd hoef te wees nie omdat U my altyd sal help.

Ek wil graag diensbaar vir U wees, ’n geloof hê wat berge sal versit en aan U gee wat U toekom. Help my om ontslae te raak van die balk in my eie oog, om weer soos ’n kind te word wat heeltemal afhanklik van U is.

Dankie dat U vir my lewende water en brood wat lewe gee is, dat U my vir altyd van geestelike dors en honger sal vrywaar. Ek bely dat U die Christus, die Seun van God is. Maak dit vir my moontlik om onvoorwaardelik te vergewe, en om U en ander mense met ’n allesinsluitende liefde lief te hê omdat u Gees reeds hierdie liefde in my hart uitgestort het.

Here Jesus, U is vir my die opstanding en die lewe; maak my bereid om myself te verloën, om die minste te wees en ander te dien. Ek aanbid U as die weg, die waarheid en die lewe – gee vir my u vrede en help my om blywende vrugte vir U te dra. Ek wil graag u boodskap uitdra sodat ander mense sal kan sien hoe lief ek U het.

Here Jesus, vergewe my asseblief dat ek baiekeer nog so ontevrede en onvergenoegd is; dat ek geneig is om oor alles te kla en só die lewe vir myself en vir ander ongelukkig maak.

Ek is jammer Here, en ek kom bid nou dat U asseblief self u vrede in my lewe sal gee.

Gee dat ek daardie vrede in elke situasie sal ervaar: vrede in probleemtye, vrede wanneer daar krisisse in my lewe opduik, vrede ook wanneer alles vir my verkeerd loop.

Dankie dat U na die wêreld gekom het sodat daar vrede tussen my en God kan wees.

Maar, Here, help my ook om vrede te maak met dié mense met wie ek op die oomblik in onvrede leef.

Help my om van nou af so te leef dat u vrede ’n onlosmaaklike deel van my lewe sal vorm; dat ek, oral waar ek gaan, ’n instrument van u vrede sal wees.

Here, ek is so in die skuld by U. U weet hoe hard ek probeer om heilig te leef, maar as ek weer sien, het ek al weer gesondig. Vergewe my, asseblief. Wys my sonde uit. Iedere een: sonde van gedagtes, dade en versuim.

Here, U ken elkeen van hulle. Maak my so sensitief vir die verkeerde dinge dat ek onmiddellik sal weet wanneer ek sondig. Help my dan om die verkeerde reg te stel. Dankie dat ek weet U is elke keer bereid om my te vergewe. Meer nog: U het reeds die prys vir daardie sonde volkome vereffen. Maak my heilig, Here, soos U heilig is.

Here, gee dat ek U sal liefhê, dat ek nooit sal verleer om te lag nie, dat ek die mooie in die lewe sal raaksien, ander se belange sal vooropstel en my sal beywer om van die wêreld ’n beter plek te maak. Help my om ook in tye van swaarkry u liefde uit te leef. Maak my gewillig om U te gehoorsaam en te dien.

Here, dankie dat u kinders elkeen ’n spesifieke gawe het waarmee hulle U kan dien en verheerlik binne die ruimte van hul gemeente en gemeenskap. Dankie dat ook ek so ’n unieke geskenk van U gekry het.

Maak my asseblief bewus van dié gawes wat U aan my toevertrou het. Vergewe my dat ek al só dikwels jaloers was op die gawes van ander dat ek van my eie gawes vergeet het of dit as onbelangrik afgemaak het. Rus my toe en motiveer my om daardie gawes wat U aan my gegee het ten beste in u diens aan te wend. Sodat u koninkryk sal kom en u Naam verheerlik sal word in my lewe en in my gemeente en gemeenskap.

Tydsbesteding

Hier is ek, Here. Gebruik my: in my gemeente, in my gemeenskap, in my vriendekring, in my huis. Maak my diensbaar vir U in my verhoudings met ander mense. Dankie dat ek weet dat die werk wat ek vir U doen in die kort tyd wat ek tot my beskikking het wel ewigheidswaarde het.

Hemelse Vader, help my om só op te tree dat mense sal kan sien U is by my. Wys my hoe ek elke dag in u teenwoordigheid kan leef.

Hemelse Vader, help my om soos ’n kind van U te leef, om ’n ligdraer te wees en u Woord uit te dra. Ek wil dit graag met eerbied en ontsag en sonder kla of teëpraat doen. Maak dit vir my moontlik, asseblief.

Hemelse Vader, Daar is so baie dinge wat beslag lê op my tyd: huiswerk, kosmaak, kinders karwei, projekte by die werk.

Die vier en twintig ure van die dag vlieg so vinnig verby dat dit soms vir my voel asof ek nooit meer tyd oor het nie – nie tyd vir myself, my gesin óf U nie.

Leer my asseblief opnuut wat die heel belangrikste is. Gee dat ek sal besef dat ek nie reg op my tyd het nie, maar dat dit ’n genadegawe uit u hand is.

Bewaar my daarvan dat ek so besig sal wees met my daaglikse pligte dat ek nie vir U tyd het nie.

Help my om tyd te maak vir Bybelstudie, gebed en gemeenskap met U. Leer my om nee te sê vir onnodige verpligtings. Help my om heel eerste u koninkryk en u wil te soek. Dankie dat ek dan kan weet dat U vir my al die ander dinge daarby sal gee – ook genoeg tyd.

Hemelse Vader, vergewe my asseblief dat my voorkeure baiekeer so verkeerd is, dat ek die kosbare ure van my dag deurgebring het met die lees van nuttelose boeke, die uitvoer van onnodige take, met gesprekke oor oppervlakkige onderwerpe – sodat ek aan die einde van die dag uitgevind het dat daar nie genoeg tyd oor is vir U nie. Help my om my ure reg te beplan sodat ek heel eerste vir U sal tyd inruim. Help my dat dit wat ek wel doen, ek sal doen asof dit vir U is.

Dankie dat ek kan weet dat kwaliteittyd met U my met oorgenoeg tyd sal laat om my verpligtings met u hulp klaar te kry. Help my om elke dag vir U ruimte te maak in my program sodat my prioriteite én my hart op die regte plek sal wees.

Hemelse Vader, vergewe my dat ek baiekeer so ’n lui Christen is; dat ek elke dag hard probeer om U te volg, om volgens die riglyne van u Woord te leef, maar die verstand wat U my gegee het so maklik verwaarloos.

Help my om van nou af my verstand oefening te gee; om die waarhede in u Woord opnuut te ontdek met die leiding van u Heilige Gees, om die wonders van u skepping te ondersoek en te bestudeer. Gee vir my die wysheid en die insig om u Woord aan ander te kan verduidelik.

Hemelse Vader, ek wil graag die tyd wat ek op aarde oor het sinvol gebruik: Ek wil die gawes wat ek van U gekry het, ontgin en leer hoe om U en ander nog liewer te hê. Van vandag af wil ek met ie leef, bereid wees om te leer, u krag in my lewe ontplooi, elke dag voluit leef en net op U vertrou.

Ek wil nie langer tyd mors met onbenullighede nie, maar my liggaam beter oppas, my drome waar maak en absoluut afhanklik van U leef. Vergewe my dat ek U en my geliefdes so dikwels afskeep omdat my tyd te beperk is, en leer my om op die regte manier te kommunikeer.

Maak my bereid om ander van harte te vergewe, minder selfsugtig en met groter integriteit te leef, konflik te leer hanteer en ’n dankbaarder mens te wees. Ek wil graag u koers vir my lewe volg en gereed wees wanneer U my kom haal om vir altyd by U te wees.

Verander my en maak my nuut sodat ek nuut sal dink en leef. Dankie dat U steeds wonders doen, dat U dit vir my moontlik maak om ’n blywende erfenis vir my kinders en kleinkinders na te laat. Help my om elke dag saad te saai wat vrug sal dra vir u koninkryk, en om die regte boumateriaal vir my lewe te gebruik.

Here, ek wil van nou af ten volle toegewy aan U leef sodat U ’n al groter werklikheid in my lewe sal wees.

Ek wil nie langer my ouderdom voorhou waarom ek dit nie kan doen nie.

Dankie vir u belofte dat U my positief in u koninkryk sal gebruik – en dat dié dinge wat ek vir U doen, my nou reeds sal voorberei vir die ewige lewe wat vir my voorlê.

Here, dankie vir dié waarheid wat ek vandag kon leer: dat stadiger soms vinniger kan beteken. Dat ek my pas moet verslap om meer tyd saam met U deur te bring; dat ek alleen só my besige dag met vertroue kan tegemoetgaan.

Dankie dat U my geestelik toerus wanneer ek stil word met u Woord; dat U my krag gee wanneer ek met U praat in gebed; dat U my lei en leer wanneer ek U vra om by my te wees – my hele oorvol dag lank. Maak my bereid om remme aan te slaan, om u koninkryk eerste te stel.

Dankie vir u belofte dat U dan ook vir al die ander dinge sal sorg.

Here, U wat my so goed ken, weet presies hoe besig ek is. U ken al die verpligtings wat ek elke dag moet nakom. U weet van die eise wat lewensmaat, kind, werk en huis aan ’n vrou stel. U weet dat alles soms vir my te veel word, dat ek voel asof ek net nie verder kan nie.

Ek is so moeg, Here. Ek verlang na u vrede, na die rus wat U my in u Woord belowe. Wys my asseblief watter van my talle take die belangrikste is, en watter maar vir eers gelos kan word.

Ek kom nou met al my verantwoordelikhede na U toe. Vanmôre wil ek soos Maria net aan u voete sit en na u stem luister.

Lofprysing

Hemelse Vader, dankie dat ek in Dawid se voetspore kan stap en so myself en vir U beter kan leer ken.

In Dawid sien ek so baie raakpunte met my eie lewe: Hy het ook voor versoekings geswig, foute begaan en leuens vertel.

Hy was ook ongehoorsaam aan U. Tog het hy elke keer na U toe teruggekom en sy sonde bely, en dan het U hom vergewe.

Dankie dat U my kies om u kind te wees soos U Dawid gekies het om koning te wees. Maak my gewillig om, soos hy, gevare in u krag aan te durf.

Gee dat my vriende vir my net so kosbaar sal wees soos Jonatan vir Dawid was. En dat ek, soos hy, getrou sal bly aan my beloftes.

Dankie vir die versekering dat ek U aan my kant het, dat U my teen gevare sal beskerm en my weer blydskap na swaarkry sal gee.

Help my om nie na die duiwel se aanhitsing te luister nie. Ek wil U loof omdat U so baie beloftes vir my waar gemaak het.

Soos Dawid bely ek dat ek U baie liefhet, dat U vir my ’n skuilplek is, ’n rots in gevaartye, dat U my enigste bron van sekuriteit is.

Ek wil aan U die eer gee vir alles wat ek in my lewe bereik het.

Maak my ’n mens na u hart wat U sal liefhê, gehoorsaam en dien vir die res van my lewe sodat ek sal beantwoord aan die doel waarvoor U my gemaak het.

Hemelse Vader, ek loof U vir die opwindende belofte wat ook aan my adres gerig is: dat U vir my iets nuuts gaan doen; dat U in my persoonlike stuk woestyn ’n pad gaan maak en vir my riviere in die droë wêreld sal laat ontspring.

Ek weet ek hoef nie langer aan my verlede vas te hou en optelsomme van al my probleme te maak nie. Ek weet ook dat U vir my in die toekoms sal onderneem presies soos wat U in die verlede gedoen het.

Dankie dat ek seker mag weet dat, hoewel dit op die oomblik nie so voorspoedig met my gaan nie, daar in die toekoms ’n nuwe hemel en ’n nuwe aarde op my wag; dat ek daar van al my seerkry en pyne verlos sal wees; dat Uself my trane sal afvee, alles vir my nuut sal maak en vir ewig by my sal bly.

Hemelse Vader, Ek loof U vir die wonder van die voorreg om elkeen van my wense en begeertes met groot vrymoedigheid na u genadetroon te mag bring omdat U my belowe het dat U my gebede hoor en verhoor, mits dit in lyn met u wil is.

Baie dankie dat U elke oomblik van elke dag vir my beskikbaar is. Leer my om eers stil te word voordat ek met U praat om net op U te fokus en fyn te luister totdat ek u stem kan hoor.

Ek wil voor U neerbuig en U aanbid; U loof vir wie U is en vir wat U vir my doen; U dank vir elkeen van die baie seëninge wat U so oorvloedig oor my uitstort.

Ek weet dat my gesprekke met U my verander sodat ek al hoe nader aan U sal kom, U al hoe beter sal leer ken, en al hoe meer soos U sal word.

Dankie dat ek mag bid wanneer ek swaar kry en hartseer of bekommerd is, met die seker wete dat Ú van al my probleme weet en my daarmee sal help. Ek wil U raadpleeg voordat ek enige besluite neem, en elke dag u leiding volg.

Dis wonderlik om te weet dat Uself by my teenwoordig is wanneer ek kniel om te bid; dat U u opstandingskrag tot my beskikking stel en nog baie méér vir my wil gee as waarvoor ek bid of wat ek dink. Heilige Gees, leer U my om te bid soos God wil hê, en neem dan my stamelende gebede reguit na God se genadetroon toe.

Here, U het die wêreld so wonderlik gemaak – ek wil U daarvoor loof. Dankie vir die skoonheid in klein, alledaagse dinge: die kleure van die veld se blommeprag; die lig wat ná ’n storm deur die wolke breek; ’n kind se skaterlag. Dankie vir elke wonder wat in u skepping opgesluit lê: Die fyn besonderhede waarmee U mens, plant en dier gemaak het; vriendskappe en verhoudings; dat ook die mens kan skep – deur kuns, musiek, letterkunde. Open my oë vir u wonders sodat ek my sintuie sal gebruik om elke dag voluit te leef en my kanse ten beste te benut, maar bowenal sodat ek nooit sal vergeet om U te eer as die Skepper van die wonders in die lewe nie.

Vader, as ek aan alles dink wat U vir my is en doen, kom ek net weer onder die indruk van hoe groot en magtig U is. Maak my getrou aan U. Vader, baie dankie vir die belofte dat U in elke krisis wat op my wag, bý my sal wees; dat U my nooit in die steek sal laat nie, maar my sal help soos U vir u volk van ouds gedoen het. Ek loof U vir u reddende teenwoordigheid in my lewe. Vader, hoe groot is U! Ek loof U vir die omvang van u kennis, vir u groot wysheid, vir die feit dat alle dinge uit U en deur U en tot U is. Aan U behoort die heerlikheid vir altyd!

Danksegging

Hemelse Vader, vergewe my asseblief dat ek so dikwels voor die versoeking swig om klaerig en ondankbaar te wees. Ek weet, Here, dat ek steeds soveel redes oor het waarvoor ek vir U dankie kan sê.

Ek loof U vir mense wat my liefhet, vir my kinders en kleinkinders, vir my vriende en familie.

Baie dankie vir gesondheid en lewenskrag, vir die nodige lewensmiddels, vir musiek en boeke en die natuur daarbuite.

Dankie dat U vir my dié dinge gee waarsonder ek nie kan klaarkom nie, hoewel ek nie altyd alles kry wat ek graag wil hê nie.

Here, maak my dankbaar in alles – selfs vir dié dinge wat ek liewers anders sou wou hê: vir siekte en swaarkry wat my nader aan U bring; vir gebrek aan fondse wat my verplig om op U te vertrou; vir eensaamheid wat my U laat opsoek – want ek weet uit ondervinding dat dit wat U gee altyd die heel beste vir my is.

Here Jesus, hoe wonderlik is u belofte nie dat ek absoluut niks sal kortkom nie omdat U my herder is.

Ek kon soveel kere in die verlede ervaar dat U vir my die heel beste gegee het; dat U my elke dag die nodige krag geskenk het.

Dankie dat U my elke dag van my lewe gelei het om volgens u wil te leef; dat U my naam ken en voor my uitloop sodat ek te alle tye veilig gevoel het.

Ek loof U dat ek ook u stem ken en U mag gehoorsaam; dat ek vir absoluut niks hoef bang te wees nie, veral nie vir die doodsvallei waardeur ek eendag sal moet gaan voordat ek in die hemel aanland nie.

Want, Here, ek weet seker dat U my nie net daardeur sal lei nie, maar dat U ook daar sal wees om my in die hemel te verwelkom waar ek vir altyd by U sal wees.

Here Jesus, my Verlosser, ek loof U vir u onverdiende genade vir my! Ek aanbid U as die Offerlam wat bereid was om vir my sonde aan die kruis te sterf sodat ek vir altyd daarvan verlos kon word.

Ek glo met my hele hart dat U my Verlosser is, dat U my met God en ander mense versoen het sodat ek nou ’n nuwe mens kan wees wat nuut kan leef. U het my uit die tronk van sonde verlos, die mag van die sonde oor my verbreek, en vrede tussen my en God bewerkstellig.

Gee vir my die ywer om u verlossingsboodskap in die wêreld uit te dra. Here God, dankie dat U u Seun na die wêreld stuur sodat almal wat in Hom glo, eens en vir altyd verlos kan word; dat U my keer op keer onvoorwaardelik vergewe en nooit weer aan my sonde dink nie.

Ek wil my nou daarop toelê om te leef soos wat U van my vra – maak my gewillig en bekwaam om u wil te doen. Ek wil graag een met U én my medegelowiges wees en van al ons onderlinge verskille vergeet.

Maak my u ambassadeur in die wêreld en help my om nee te sê vir my sondige begeertes. Ek loof U dat U my vrygemaak het van die kettings van die wet en my die geskenk van die ewige lewe gegee het.

Dankie vir die belofte dat ek eendag in u heerlikheid sal kan deel en U van aangesig tot aangesig sal kan sien.

Here Jesus, dankie dat U my hoop op die heerlikheid is, dat U al my sondes reeds vergewe het deur u soenverdienste aan die kruis, dat U dit vir my moontlik maak om eendag vir altyd te leef.

Ek bid nou dat U my deur my geloof vol sal maak van die vreugde en vrede wat van U af kom sodat my hoop al hoe sterker kan word deur die krag van u Heilige Gees.

Here Jesus, dit is wonderlik dat ek in gebed met U kan praat, U kan aanbid, U kan dank, en my begeertes en bekommernisse met U kan deel. Dankie dat U luister.

Vader, baie dankie vir die talente en vermoëns wat U aan my toevertrou het. Vergewe my dat ek my so dikwels met ander vergelyk en vergeet om dankbaar te wees vir wat U aan my gegee het.

Vader, dankie vir u genade, u liefde en die teenwoordigheid van u Heilige Gees in my lewe. Dit verseker my elke dag opnuut dat ek nooit weer sonder U hoef te leef nie.

Vreugde

Hemelse Vader, soos alle mense wil ek ook graag gelukkig wees. Dankie vir die resep vir ware geluk.

Ek bid dat U my sal help om my hart van haat en my lewe van bekommernis te bevry.

Maak my gewillig om eenvoudiger te leef, meer te gee en minder te verwag.

Here, ek wil graag probeer om u wet te gehoorsaam en u gebooie te hou sodat ek gelukkig sal wees in wat ek doen.

Gee dat ek my verhouding met U sal verinnig, meer tyd saam met U sal deurbring en ook sal werk aan my verhouding met ander mense, want ek weet dat ek gelukkig sal wees as ek daarin kan slaag om ander mense gelukkig te maak.

Ek bid dat U vir my ’n bril van geluk sal gee waardeur ek na my omstandighede én die wêreld om my kan kyk.

Dankie vir u belofte dat ek gelukkig sal wees en dit met my goed sal gaan as ek U dien en u wil gehoorsaam.

Hemelse Vader, vandag kom ek U loof vir die gawe van humor – vir die bevryding van ’n skaterlag; vir die geskenk wat U aan my gegee het om die komieklike dinge om my raak te kan sien en hulle aan ander oor te dra.

Dankie dat ek vrolik en bly mag wees, dat die lewe elke dag vir my ’n fees is omdat ek U ken en liefhet; dat my vreugde nie afhanklik is van my omstandighede nie, maar dat dit in U gesetel is.

Ek weet dat dit Uself is wat hierdie vreugdevonkie binne-in my geplaas het.

Maak van my ’n vreugdemens wat ander sal inspireer en die donker uit hul lewe sal haal sodat ander mense gelukkiger sal wees omdat hulle my geken het.

Here Jesus, dankie dat u Woord my leer dat ek altyddeur bly kan wees, ook wanneer dit nie so goed met my gaan nie. Leer my om soos Paulus en Silas in die tronk te kan sing.

Gee dat hierdie vreugde omdat ek u kind is ook na ander toe sal oorspoel. Dankie dat ek bly kan wees ook te midde van swaarkry omdat ek weet dat dit my nader aan U bring.

Leer my om die mooi in my lewe wat van U kom raak te sien en te waardeer; om vreugde te vind in klein dingetjies: die eerste roos van die lente, mooi musiek, die skaterlag van ’n kind, die laaste sonstrale oor die see.

Dankie dat ek bly kan wees omdat U my God is – die eintlike Bron van al my blydskap.

Leer my om U te loof, om bly te wees omdat U die prys van my sonde aan die kruis betaal het.

Leer my ook om U te loof met my gebed. Soos die digter van Psalm 51:17 wil ek van U vra: “Gee my die woorde om u lof te verkondig.”

Vriendskap

Hemelse Vader, U weet dat ek al so baie vriende deur die dood verloor het dat dit soms vir my voel asof ek bitter min vriende oor het.

Dankie vir dié vriende op wie ek al soveel jare reken, dié mense met wie ek my vreugdes en my hartseer deel.

Dankie dat hulle bereid is om vir my plek te maak alhoewel hul programme baie besiger is as myne. Help my om, noudat ek meer tyd het, meer tyd af te staan aan my vriende.

Help my om uit te reik na dié mense wat nog meer alleen as ek is en my vriendskap vir hulle aan te bied.

Leer my bowenal, Here, dat al het ek min vriende óór, ek steeds nuwe vriende kan soek omdat ek eers ’n vriend moet wees voordat ek ánder vriende kan hê.

Vader, baie dankie vir die weelde van vriende met wie ek my sukses en my geloof kan deel. Help my om genoeg tyd vir my vriende te maak.

Hemelse Vader, ek loof U vir elkeen van my vriende wat my lewe so oneindig verryk. Maak my ’n ware vriend vir my vriende en wys my hoe ek hulle kan ondersteun en help.

Siekte

Hemelse Vader, ek bely dat ek u weë nie verstaan nie, dat ek op die oomblik so seergemaak voel, dat ek selfs in U teleurgesteld is omdat U my nie gesond maak nie.

U weet hoe hierdie siekte my aftakel, nie net liggaamlik nie maar ook geestelik.

Ek besef nou dat ek nie aan U kan voorskryf nie, dat ek my nie kan aanmatig om te weet wat u wil is nie, dat élke kind van U siekte en swaarkry beleef omdat ons in ’n sondige wêreld leef.

Dankie dat ek kosbare lesse kan leer hier op my siekbed, dat U my opnuut die kosbaarheid van die lewe laat ontdek en my meer meegevoel gee met ander wat siek is.

Maak my gesond as dit u wil is.

En as dit nie is nie, gee dat ek ’n stralende getuie vir U sal wees op hierdie siekbed sodat U deur my siekte verheerlik sal word.

Hemelse Vader, ek weet dat U my deur en deur ken; dat daar absoluut niks is wat ek vir U kan wegsteek nie. U weet ook van die vretende pyn wat my wil vernietig, Here. Die pyn wat my nie eers ’n oomblik met rus wil laat nie. Soms voel dit vir my asof ek nie meer kan nie. Dankie vir die nuwe insig dat pyn ook goed vir my kan wees omdat dit my aandag vestig op simptome wat vir my lewensgevaarlik mag wees; omdat ek ten spyte van die pyn seker mag weet dat U by my is, dat u hande om my is in my pyn, dat U my help en vashou en dra en vir my met hierdie pyn wil leer om nog vaster op U te vertrou. Dankie vir u belofte dat U my nooit bo my kragte sal versoek nie; dat U ook vir my die genade sal gee om hierdie pyn te verdra omdat ek weet dat dit my nader aan U bring en my help om empatie te hê met ander se pyn.

Here Jesus, op die oomblik kan ek my so goed vereenselwig met die psalmdigter wat by U wil weet of daar ooit nog vir hom hoop oor is – en dan bely dat Ú sy enigste hoop is.

U weet dat dit glad nie goed met my gaan nie; dat ek elke dag siek is en erge pyn moet verduur.

Dankie vir die vonkie hoop wat Uself in my lewe geplant het. Dit laat my aan U vashou ten spyte van my omstandighede, sodat ek dit – altyd met u hulp – kan regkry om nie my hoop te verloor nie, maar steeds met vreugde en vrede vervul te wees, al gaan dit ook fisiek hoe sleg met my.

Ek bid dat U daardie vonkie hoop tot ’n vuur sal aanblaas, ’n vuur wat niks sal kan blus nie, omdat my hoop gevestig is op daardie onverganklike, onbesmette en onverwelklike erfenis wat U in die hemel vir u kinders in bewaring hou.

Here, vandag voel ek so ver verwyder van u genade. Hierdie siekte takel my so af dat U ver en vreemd voel. Ek ervaar nie u liefde in my lewe nie, al weet ek hier diep binne dat U omgee, dat U my liefhet, my sonde vergewe en vir my u genade kom aanbied. Here, ek voel asof ek nie een tree verder kan loop nie, asof hierdie kursus van U vir my te moeilik is. Sal U my nie optel en dra nie? Gee my die krag om voort te gaan. Dankie vir die versekering dat U altyd weer my hart deur u genade sal versterk.

Here, ek is al so lank siek, en dis moeilik om te aanvaar dat U my nie gesond maak nie. Help my om aan U te bly glo en om vir mense wat na my kyk, ’n bewys van u liefde te wees.

Here, hierdie siekte maak my moeg en moedeloos. Skenk asseblief genesing as dit u wil is, maar dankie in elk geval dat ek ook in hierdie omstandighede aan U kan vashou en nader aan U kan groei.

Kommer

Hemelse Vader, dit laat my veilig voel om te weet U is vir my ’n skuilplek: ’n skuiling teen die lewenstorms. By U is rus en vrede en volkome veiligheid. Dankie daarvoor. Dankie dat ek al so baie in u oop arms kon inhardloop – soos ’n bang kind na sy of haar ouer toe. Bewaar my daarvan dat ek U sal beskou as bloot ’n veilige hawe wanneer gevaar dreig. Maak my vir U beskikbaar. Gee dat ek altyd daar sal wees wanneer U my wil gebruik; dat ek in my daaglikse lewe vir U ’n getuie sal wees. Maak my op my beurt ’n rusplek vir ander wat swaar kry of in gevaar verkeer.

Hemelse Vader, ek bring vandag al my baie bekommernisse na U toe. Dankie dat ek dit nie eens vir U hoef uit te stippel nie omdat U reeds van almal weet. Vergewe my dat ek aan die een kant weet en glo U sal sorg, maar aan die ander kant nog so somme maak en aan my bekommernisse bly vasklou. Help my om dit in u hande te laat.

Here, gee dat ek ook die opdrag in u Woord sal nakom: dat ek my heel eerste vir die uitbreiding van u koninkryk sal beywer; dat ek in alles wat ek doen en van U vra, u wil voorop sal stel.

Dankie dat ek dan seker kan weet: U sal sorg, U sal my alles gee wat ek nodig het – vir vandag, môre én oormôre – en U sal ook al my bekommernisse vir u rekening neem.

Hemelse Vader, U ken my so goed en daarom weet U dat ek soms bang is omdat dit nie altyd vir my voel dat U digby my is nie.

Dankie vir die versekering dat U my nooit alleen sal laat nie, dat U elke uur van elke dag by my is om my lief te hê, by te staan, te lei en te help.

Ek weet dat ek op u krag kan staatmaak as myne min raak, dat U na elkeen van my gebede luister, dat U nie net by my is nie, maar deur u Heilige Gees ín my lewe teenwoordig is.

Dankie dat ek vir absoluut niks hoef bang te wees nie omdat ek weet dat ek, met U by my en met u krag tot my beskikking, vir elke gevaar of ramp wat my mag tref voorbereid kan wees. Dankie dat U my selfs deur die doodsvallei sal vergesel sodat ek eendag veilig in die hemel sal aanland.

Ek wil nou bedaar en erken dat U alleen God is.

Hemelse Vader, dankie vir die gerusstelling dat U vir my sal sorg – nie net vir vandag nie, maar ook in die jare wat voorlê – selfs al lyk my finansiële posisie op die oomblik bra benard, selfs al is ek glad nie gesond nie en betrap ek my dikwels dat ek paniekerig wil raak.

Ek bid dat U my rustig sal maak; dat U my net weer sal verseker dat U vir my sal onderneem net soos U dit vir die lelies en die voëltjies doen; dat ek geen rede tot kommer het nie omdat ek ’n God aanbid wat instaan vir sy kinders.

Ek verlaat my nou op u beloftes, Here.

Ek glo dat U elkeen van my bekommernisse vir u rekening sal neem, en dat U elke stukkie twyfel in my hart vir goed sal wegneem en dit met vertroue in U sal vervang.

Hemelse Vader, vandag is dit vir my feitlik onmoontlik om nie ontsteld te raak nie.

U weet wat my omstandighede is.

U weet ook hoe hard ek probeer om in U te bly glo, maar, Here, ek is nou waar Jaïrus was toe die mense vir hom kom sê het dat sy dogtertjie reeds dood is.

Vir my lyk dit asof dit klaar te laat is om enigiets aan my situasie te doen.

Dankie vir Jaïrus se verhaal, vir die versekering dat U almagtig is, dat selfs die dood U nie kan keer nie.

Ek bid om ’n wonderwerk in my lewe, Here.

Maak die storm in my stil, gee dat my ontsteltenis sal bedaar, kom maak alles weer reg vir my sodat ek in U kan bly glo en weer u vreugde en vrede in my lewe kan ervaar.

Hemelse Vader, vergewe my asseblief dat ek dit maar nie kan regkry om al my bekommernisse na U kant toe te gooi en heeltemal van hulle te vergeet nie.

U weet van al die dinge waaroor ek bekommerd is – en ek bring hulle wel op ’n gereelde grondslag na U toe, maar, Here, net die volgende dag laai ek elkeen van hulle weer op en probeer self verder sukkel.

Maak dit asseblief vir my moontlik om al my bekommernisse nie net aan U bekend te maak nie, maar hulle vir goed daar by U te los omdat ek weet dat U vir my sal sorg, dat U my bekommernisse vir u rekening sal neem sodat ek eerstehands kan ervaar dat u vrede, wat alle verstand te bowe gaan, oor my hart en lewe die wag sal hou in Jesus Christus.

Here Jesus, U ken my so goed.

U weet ook van dié kere wanneer ek in onmoontlike, onoplosbare situasies beland.

Dankie vir u Woord vandag, dat ek weer eens kon leer: Alhoewel ék geen uitweg kan sien nie, is U in staat om elke situasie te verander – om verlies in wins te omskep.

Dankie dat U ’n oplossing gee wanneer dit volgens menslike maatstawwe onmoontlik lyk. Dit is wonderlik dat U nie ingeperk word deur my beperkte geloofsirkeltjie nie!

Dankie dat U elke keer gewillig is om te help; dat U vir my sal intree; dat U ook vir my sal red – deur baie of deur min.

Help my asseblief om ook nou, te midde van my probleme, op U alleen te vertrou.

Here Jesus, ek kom nou na U toe met my swaar streslading. Ek wil dit by u voete los. Dankie dat U vir my u vrede belowe.

Here, by tye word ek ook paniekerig soos Gehasi – maak asseblief elke keer my oë oop sodat ek kan sien dat my vrese ongegrond is; dat u teenwoordigheid baie meer beteken as getalsterkte. Leer my in swaarkrytye dat geloof beteken om aan U vas te hou; om seker te weet: U kan my nie vergeet nie – U het my naam in u handpalm gegraveer.

Gee my die moed, Here, om dit verder te waag as wat ek kan sien; om onwrikbaar op U te vertrou – selfs in moeilike omstandighede.

Here, daar is nog so baie dinge waaroor ek my bekommer. Ek wil hulle almal nou na U bring met die seker wete dat U vir my sal sorg. Help my om in die vervolg eerder ánder mense wat bekommerd is, moed in te praat.

Here, dankie dat ek na U mag kyk wanneer daar krisisse in my lewe opduik met die wete dat U vir my van die krag sal voorsien wat ek nodig het.

Here, dankie dat U my vrede is; dat U belowe om ook aan my u vrede te gee – nie soos die wêreld gee nie, maar soos alleen U kan.

Gee dat die vrede wat U gee in ons land en in my lewe die deurslag sal gee.

Maak die opstand in my stil, die waarom-vrae en soms ook die bitterheid wat ek nie altyd kan keer nie.

Neem dié struikelblokke wat die vrede in my hart belemmer, weg sodat ek u vrede in my lewe kan ervaar.

Help my om hierdie vrede deur te gee en uit te dra na ’n wêreld vol onvrede.

Here, hoe goed ken U my nie.

U weet ook van my opstandigheid vandag oor hierdie onverstaanbare, skynbaar sinlose en totaal onaanvaarbare gebeure.

Maar, Here, hier diep binne my weet ek vir seker dat U altyd die beste weet.

Help my om in my omstandighede te berus, om nie altyd kitsoplossings vir my probleme by U te soek nie, maar om tevrede te wees om net onwrikbaar in U te bly glo – al lyk gebeure ook hóé verkeerd vir my menslike insig. Help my om te alle tye aan U gehoorsaam te bly sodat ek probleme met u hulp sal kan hanteer.

Here, dankie vir die gerusstelling dat U vir u kinders kan en sal sorg, en dat ek ook nou mag steun op u belofte dat U dié dinge wat ek nodig het, in oorvloed vir my sal gee.

Here, help my asseblief om by U tot rus te kom. Stuur u vertroosting sodat my onrus vir altyd iets van die verlede sal wees. Ek bid dit in Jesus se Naam.

Here, dit voel op die oomblik asof die golwe wat oor my slaan my gaan oorweldig. Baie dankie vir die belofte dat U my sal red, dat U dit vir my moontlik sal maak om vir U ’n lied te sing – al is dit nog nag rondom my.

Here, ek aanbid U as die God wat wonders kan doen. Help my om in u wonderkrag te glo sodat ek ook u wonders eerstehands kan beleef.

Here, U weet so goed hoe my keel wil toetrek van benoudheid wanneer ek aan die toekoms van ons land dink. Dit voel vir my of my huis besig is om in ’n tronk te verander, of haat en geweld my voortbestaan bedreig.

Dankie dat ek as u kind weet dat swaarkry deel is van die lewe, maar dat U my van u bystand verseker.

Leer my dat my geluk nie afhanklik is van wat die wêreld my bied nie, maar dat dit op ’n baie dieper vlak lê.

Dankie dat ek saam met U die toekoms met vertroue kan tegemoetgaan omdat U my in elke moeilikheid sal bystaan en my sal bemoedig. Hou u liefde oor my, want ek stel my vertroue in U.

Swaarkry

Elke persoon stap sy eie stuk lydensweg hier op aarde, soos Jesus daardie laaste twee weke van sy lewe gedoen het.

Almal van ons ervaar seerkry en swaarkry deur die loop van ons lewe omdat niémand die lydensweg van swaarkry kan vryspring nie.

Tog is dit ’n groot troos in swaarkrytye om te weet dat Jesus hierdie swaarkrypad reeds vir jou vooruitgeloop het, dat Hy presies weet wat lyding en swaarkry behels omdat Hy dit self deurgemaak het.

En omdat Hy, terwyl Hy op aarde was, self gely het, het Hy ook simpatie met jóú persoonlike stuk swaarkry – belowe Hy dat Hy in jou swaarkrytye ekstra naby jou sal wees en vir jou die krag sal gee om dit te kan deurstaan.

Hemelse Vader, dankie dat ek in U kan glo. Help my om soos Abraham die onsienlike te kan sien.

Dankie dat ek my ook nie hoef blind te staar teen dié dinge wat ek wel sien – dit wat my keel laat toetrek – nie omdat ek weet:

U is hier te midde van my swaarkry-donkerte. By U is daar genoeg krag om my omstandighede te verwerk, al word ek met ’n ongeneeslike siekte, ’n finansiële krisis of die dood van ’n dierbare gekonfronteer.

Help my om die swaarkry vandag mis te kyk, Here. U weet dat ek dit nooit sonder u hulp sal regkry nie. Gee my u kalmte en u vrede sodat ek rus kan vind in U.

Hemelse Vader, ek besef dat ek nie langer my probleme kan ignoreer nie, dat ek daardeur sal moet beweeg as ek dit ooit vir goed agter my wil laat.

Dankie dat ek hierdie seerkry met U kan deel en dit só sagter kan maak. Neem dit nou vir u rekening.

Here, help my dat ek nie hierdeur ’n verbitterde mens sal word nie, maar dat ek die swaarkry sal toelaat om my te poleer tot ’n ryker, ryper mens as wat ek vroeër was.

Dankie vir die heling wat opgesluit lê in die natuur, in gebed en in mooi herinnerings. Help my om weer voluit te leef ná my pynlike ervaring. Ek weet nou dat ek kosbare lewenslesse kan leer uit elke stuk swaarkry. Gee dat ek myne positief sal benut.

Hemelse Vader, ek bid dat U dit nou vir my moontlik sal maak om my probleme een vir een voor U uit te pak, om ten spyte van my seerkry en swaarkry steeds na U op te kyk en van blydskap te straal, om, soos Habakuk, nogtans in U te bly jubel al bly daar absoluut niks in my lewe oor waaroor ek bly kan wees nie.

Help my om bokant my swaarkry uit te styg met die krag wat U my gee.

Ek wil nou my lof vir U as ’n offer kom aanbied, Here, ’n offer wat my duur te staan mag kom omdat ek dit nooit uit eie krag sal kan regkry nie.

Maak my seer gesond, genees my deur hierdie lofprysing, vul my opnuut met u standhoudende vreugde wat nie van my omstandighede afhanklik is nie.

Dankie vir die seker wete dat U by my is in my swaarkry, dat U my nooit tot breekpunt toe sal beproef nie – net tot groeipunt toe.

Hemelse Vader, ek loof U dat U my in Christus geroep het om deel te hê aan u ewige heerlikheid.

Dankie vir die bemoediging dat U my weer sal oprig nadat ek ’n kort rukkie gely het, en my weer moedig, sterk en standvastig sal maak.

Ek weet, Here, dat die krag aan U behoort. Daarom bid ek dat U nou vir my die nodige krag sal gee om uit te hou en aan te hou totdat hierdie swaarkry weer iets van die verlede is.

Help my om nie moed op te gee wanneer daar teenslae in my lewe kom nie, maar om te bly glo dat hierdie dinge my net sterker sal maak en ek kosbare lewenslesse daaruit sal leer.

Leer my, Here, dat hierdie seerkry vir my uiteindelik genesing sal inhou en my karakter sal vorm. Dankie vir die seker wete dat, al verloor ek alles wat ek het, U nog vir my sal oorbly.

Hemelse Vader, ek loof U vir die reddingsboei waaraan ek kan vashou: dat, al gaan dit hier op aarde hoe sleg met my, ek seker mag weet dat die stuk swaarkry van die oomblik nie sal kan opweeg teen die heerlikheid wat U vir my in die hemel gereed maak nie.

Baie dankie vir die belofte dat, al is ek op die oomblik besig om uiterlik te vergaan, U my elke dag geestelik sterker maak en innerlik vernuwe.

Here Jesus, dankie dat U vir my die angel uit die dood kom haal het en vir my die ewige lewe sal gee omdat niemand my ooit uit u hand sal kan ruk nie.

Maak dit nou asseblief vir my moontlik om weg te kyk van al daardie dinge wat vir my moeilik is en na U te kyk – na die onsigbare dinge wat vir altyd sal bly.

Hemelse Vader, ek weet dat die wêreld op sy beste van tye ’n plek is waar ek met probleme en swaarkry te kampe gaan hê.

Soms wens ek dat my lewe hier op aarde kan verbygaan omdat dit regtig nie elke dag vir my maklik is nie.

Dankie dat die aardse “nag” vir my byna verby is, dat die aanbreek van u dag moontlik nie meer ver in die toekoms lê nie.

Gee dat ek u wederkoms elke dag sal verwag, en help my asseblief dat ek die tydjie wat ek nog in hierdie tranedal oor het, ten beste sal benut deur tyd te maak vir U.

Dat ek elke dag soos ’n ligmens sal leef wat u lig en liefde sal versprei deur U en ander mense lief te hê.

Maak my vrolik en vriendelik ten spyte van my omstandighede sodat mense wat na my kyk, sal kan sien dat ek U ken en liefhet.

Hemelse Vader, ek weet nou dat my geloof in U my nie van pyn en lyding vrywaar nie.

Dankie vir die versekering dat my seerkry ’n einddatum het, dat dit nie vir altyd kan aanhou nie, dat ek mag weet dat U uiteindelik vir altyd ’n einde daaraan sal maak, dat dit op die ou end vir my sal uitloop op dié hemelse heerlikheid wat alles sal oortref, dié heerlikheid wat U aan u kinders belowe het.

Help my om my seerkry met U te deel, en gee vir my u vrede te midde van my pyn.

Maak dit vir my moontlik om ook wanneer ek swaar kry vir ander wat na my kyk te wys dat ek steeds op U vertrou.

Vader, dankie vir u bystand in swaarkrytye.

Dankie dat U my dag na dag en uur na uur dra sodat selfs die ergste swaarkry verlig word omdat ek weet: Die uitkoms is net om die draai.

Hemelse Vader, vandag dreig die golwe om my voete onder my uit te slaan, die water dreig om oor my kop toe te maak.

Ek vergaan, Here, ontferm U oor my!

Ek besef nou my eie swakheid en dit onderstreep vir my u almag.

Dankie vir u Woord wat my verseker dat U by my is wanneer ek deur diep waters moet gaan, dat U sal sorg dat die riviere van swaarkry my nie sal oorstroom nie.

Help my om my “hoekom ek?”-vrae te verander in “wat kan ek uit hierdie situasie leer?”-vrae.

Verander my ten goede juis omdat ek swaarkry leer ken het.

Gee vir my ’n nuwe soeke na U, ’n ander uitkyk op die lewe.

Gee dat hierdie seerkry-ervaring my sal leer om in die toekoms heiliger te leef.

Ek weet dat U selfs hierdie lyding vir my sinvol kan maak. Doen dit vir my, Here.

Here Jesus, hoe goed is dit nie om te weet dat U by my is as ek swaarkry nie!

Dat U saam swaarkry en saam met my huil, dat daar niemand is wat my swaarkry beter verstaan as juis U nie omdat Uself ’n mens was wat bekend was met lyding.

Here, my moed is vandag min en ek sien nie kans vir die swaarkrypad wat voor my lê nie.

Baie dankie vir die versekering dat U daardie pad sal saamstap, dat U elke oomblik van my lyding by my sal wees, dat U my sal dra as ek nie self verder kan nie, dat U my uiteindelik deur die vallei van swaarkry sal vergesel tot by u Vaderhuis, waar daar geen swaarkry ooit weer sal wees nie.

Ek loof U daarvoor en ek kom eien nou u krag vir my toe, dié krag wat dit vir my moontlik sal maak om nie net die swaarkry te kan verdra nie, maar ook om nog nader aan U te groei terwyl ek ly.

Here Jesus, ek besef dat hierdie swaarkry wat ek op die oomblik in my lewe ervaar, heel moontlik ’n tugmaatreël van u kant is, dat dit juis met my gebeur omdat U my liefhet en my nader aan U wil trek.

Maar, Here, hierdie tug is glad nie vir my lekker nie en soms laat dit my ’n vraagteken plaas agter u liefde vir my.

Leer my dat dit tog goed en nodig is omdat dit my leer om meer gehoorsaam te wees en die vrug van vrede in my lewe gee.

Ek weet dat U dit ook wil gebruik om my heilig te maak soos U heilig is.

Help my om die verkeerde in my lewe agter te laat en elke dag al hoe meer soos Jesus te word.

Dankie dat U saam met my ly en dat ek die versekering het dat U my uiteindelik deur die lyding sal dra omdat dit u liefdeshandeling in my lewe is.

Here, ek roep na U maar ek kan U nie hoor nie. Dit voel vir my asof U u aan my onttrek het, asof U heeltemal van my vergeet het.

Here, hierdie seer takel my totaal af; ek kan nie meer bid nie, ek kan nie meer glo nie, ek wil net stil wees by U en u arms om my voel.

Help my om my nou op u Heilige Gees in te stel.

Dankie dat u liefde en teenwoordigheid nie van my gevoelens afhang nie, dat ek altyd kan weet dat U by my is, ook wanneer my geloof min raak.

Dankie dat ek weet dat U nooit ver van my af kán wees nie omdat U deur u Gees in my woon. Heilige Gees, kom verseker my weer van u liefde vir my.

Ek loof U vir die versekering dat ek nie is wat ek voel nie, en dat ek deur hierdie seerkry heen steeds u geliefde kind sal bly omdat U my hemelse Vader is.

Here Jesus, U kan my die beste troos in swaarkrytye omdat Uself so swaar gekry het.

U is verbrysel omdat ek ’n sondaar is, maar deur u wonde het daar uiteindelik vir my genesing gekom.

U kruisdood bring standhoudende vreugde in my lewe.

Maak dit ook waar van my wonde, Here, dat elkeen van hulle ’n bron van genesing vir iemand anders sal wees.

Dankie dat U my nog altyd in elke moeilikheid gehelp het sodat ek ook ander kan help wat in dieselfde moeilikheid verkeer en dat ek om hierdie rede selfs bly kan wees oor my probleme.

Dankie vir die les wat ek vandag kon leer; juis ómdat ekself swaar gekry het, is ek nou soveel beter toegerus om ánder mense wat ook swaar kry te help met die ervaring, insig en kennis wat my seerkry my gebring het.

Gee vir my die regte woorde van bemoediging waarmee ek hulle kan moed inpraat, en opregte omgee-liefde sodat ek na hulle kan uitreik.

Here, dit is vir my moeilik om te verstaan dat U soms swaarkry in my lewe toelaat met die doel om my nader aan U te bring.

Dat U soms my gebede onbeantwoord laat omdat U my wil leer dat u groot krag ook tot my beskikking is juis wanneer ek op my swakste is.

Here, dankie dat hierdie swaarkry wat U nie van my skouers wou afneem nie, my net weer laat besef het dat U die beste weet. En dat U in die proses my skouers sterker gemaak het.

Dankie dat ek met u hulp sterker en beter anderkant kon uitkom.

Here, dit is vir my ’n openbaring dat my swaarkry die soutkarakter van my lewe sal versterk, en dat ek daardeur ook ander se lewe kan verryk.

Here, ek het ’n nuwe gedagte ontdek: U wil saam met my krisisse vir my ’n persoonlike boodskap of taak gee. Help my om juis in swaarkrytye ekstra fyn na u stem te luister.

Here, daar is so baie gebeure wat my moedeloos, radeloos en neerslagtig maak.

Wees U my vreugde – leer my om in swaarkrytye na U te kyk en van blydskap te straal omdat ek vir seker weet: U is my Helper wat elke dag by my is; wat my nooit in die steek laat nie, maar my bystaan in en red uit moeilike omstandighede.

Gee dat my blydskap nie van omstandighede sal afhang nie, maar dat dit van binne sal kom.

Maak my gewillig om my lewe aan U oor te gee: Om alles wat uit u hand kom met vreugde te aanvaar; om elke dag voluit en met blydskap te leef; om die mooi in die lewe te waardeer, te ontgin en te geniet; en om te getuig van die vreugde wat U gee.

Here, daar is so baie ontstellende gebeure wat ek nie begryp nie – waarop ek nie antwoorde het nie.

Dankie dat ek nogtans kan weet: U is in beheer.

Dankie dat swaarkry my kan herinner dat ek van U afhanklik is. Dankie dat ek deur swaarkry nader aan U kan groei.

Here, ek wil nou my volkome afhanklikheid van U bely.

Dankie dat ek weet dat U vir my sal sorg, dat U die Een is op wie ek my lewe lank kan vertrou – dat ek maar by U kan stil word, soos ’n klein kindjie by sy of haar ma.

Ek glo dat U vandag én die toekoms beheer.

Leer my om rustig en kalm op U te wag.

Here, dis vir my moeilik om te verstaan dat swaarkry onvermydelik deel van my lewe uitmaak.

Dat Uself sê dat ek nie verbaas daaroor moet wees nie, maar dat dit vir my ’n vreugde behoort te wees om in u lyding te deel juis omdat ek dan sal oorloop van blydskap wanneer U weer kom.

Maar, Here, dis nie maklik om bly te wees oor krisisse nie. Hierdie swaarkry is besig om my onder te kry.

Dit voel vir my asof ek nooit die swaarkry-eksamen gaan slaag nie.

Dankie vir u belofte dat U by my is wanneer dit moeilik gaan: dat ek nie hoef bang te wees nie, dat U my sal versterk en help, dat U my sal leer hoe om te ly, dat Uself my hand sal vat en my sal red soos U al so baiekeer in die verlede gedoen het. Doen dit nou vir my, asseblief.

Here, ek weet dat u Woord vir my sê dat my swaarkry hier op aarde maar gering is, maar vir my voel dit glad nie so gering nie.

Vir my voel dit asof my swaarkry my hele lewe vol maak.

Dankie dat ek mag glo dat hierdie swaarkry my sal leer om U beter te gehoorsaam en dat dit eendag vir my sal uitloop op die ewige heerlikheid wat U belowe.

Leer my om vér te kyk, om geduldig te wag en styf vas te hou aan daardie belofte.

Dankie dat U magtig is om ’n pad te maak waar ek nie ’n pad kan sien nie, dat U my donker van nou weer in lig kan verander – in die stralende lig van die ewigheid wanneer pyn en seerkry vir altyd iets van die verlede sal wees. Dankie vir die toerusting wat die swaarkry my gee sodat ek op my beurt, juis as gevolg van my swaarkry, weer iets vir ander kan beteken.

Here, niemand van ons hou van donkerte nie. Dankie dat ek kon ontdek dat die donkerte van swaarkry soms nodig is in my lewe sodat ek voluit vir U kan leef.

Here, my lewe is so vol dorings op die oomblik en U weet hoeveel keer ek U al gevra het om hierdie dorings weg te neem, maar dit gebeur nie.

Leer my, soos vir Paulus, dat u genade ook in hierdie situasie vir my oorgenoeg is, dat U juis sterk is wanneer ek swak is, dat U u almag in my lewe bewys juis wanneer ek tou opgooi.

Leer my, soos vir Paulus, om met my doring saam te leef.

Praat nou duidelik met my en leer my dat dit vir my goed is om soveel te ly.

Ek bid dat U van hierdie doring uiteindelik ’n pluspunt in my lewe sal maak omdat dit my leer om U beter te ken en u groot krag in my lewe vrystel.

Gee vir my die genade om van my doring ’n getuienisgeleentheid te maak sodat ander mense sal kan sien dat ek aan U behoort.

Vader, die wêreld is so boordensvol seerkry en swaakry – hoe goed is dit om te midde daarvan met hoop te kan leef omdat ek aan U behoort.

Baie dankie dat alle aardse swaarkry maar ’n kort tydjie duur, dat dit vir u kinders ’n afsnypunt het, en vir ons uitloop op ’n ewige heerlikheid.

Ek loof U dat U elke oomblik by my is en dat U alles vir my ten goede laat meewerk; dat U daar is as ek siek en eensaam is en u krag tot my beskikking stel.

Wanneer die swaarkry vir my te veel word, weet ek vir seker dat niks vir U onmoontlik is nie en dat my lewe steeds in u hande is.

Help my om positief te dink, om selfs in die nag vir U ’n lied te sing omdat ek ontdek het dat teenspoed vir my voordelig kan wees: Dit laat my u liefde op ’n nuwe manier ervaar en gee my soveel meer simpatie met ander.

Ek bid dat U my sal help om die lewenslesse wat ek deur my lyding kan leer aan ander deur te gee, dat ek hulle sal troos soos U my getroos het.

Gee dat hulle vir U in my lewe sal raaksien en dat hulle u liefde vir hulle deur my optrede sal ervaar.

Ek weet nou, Here, dat my sonde soms die oorsaak van my pyn is.

Vergewe my sonde, Here, en lei my deur die seerkry heen totdat ek eendag vir altyd saam met U sal wees.

Hartseer

Ag, Here, ek is so verblind deur my hartseer dat ek gevaar loop om die mense wat ek liefhet af te skeep omdat ek nie genoeg tyd vir hulle maak nie.

Vergewe my asseblief, en maak die seer vir my draagliker sodat ek na my dierbares kan uitreik, al is daar nog soveel vrae waarmee ek worstel.

Here, hulle is óók hartseer – gee vir my die genade om húlle te vertroos soos U elke dag met my doen.

Hou my asseblief styf vas, Here. Vertroos U my. Wys my hoe om weer bly te wees, hoe om in u wil te berus.

Heilige Gees, ek loof U dat U vir my ’n trooster is, en ek wil sommer nou aanspraak maak op die belofte dat al my hartseer eendag in u nuwe wêreld vir altyd verby sal wees.

Hemelse Vader, wanneer ek kyk na alles wat U gemaak het – die sterre en die son, die maan en die berge en die see – staan ek opnuut verwonderd voor u almag en majesteit.

Vergewe my dat ek soms van U vergeet wanneer dit net goed met my gaan.

Ek besef nou dat hierdie seerkry wat ek so sukkel om te verwerk, eintlik die bril is waardeur ek op ’n nuwe manier na U kan kyk en U vir die eerste keer werklik kan raaksien.

Ek besef ook dat my pyn my leer om u stem soveel helderder met my te hoor praat, en om die seerkry van ander mense duideliker raak te sien.

Ek besef dat dit my ook gewillig maak om uit te reik na hulle en ’n helpende hand na hulle uit te steek.

Dankie vir die pluspunt van pyn, Here, dankie vir u onmeetlike genade in my lewe, vir u liefde wat my in my seerkry omvou, vir u arms wat altyd om my is, al gaan dit hóé moeilik.

Omdat ek nie genoeg krag het om aan U vas te hou nie, moet U my asseblief nooit laat los nie.

Hemelse Vader, baie dankie dat U van my hartseer weet, dat U ook my trane in u boek opskryf. Maak asseblief weer ’n einde aan die seerkry wat ek ervaar.

Dankie, Here, vir die wonderlike wete dat U ’n pad kan gee waar ons geen pad kan sien nie. Dankie dat U die donker gister in ’n helder môre verander – uiteindelik in die stralende môre van die ewigheid.

Hemelse Vader, dankie vir die wete dat as die “wintertye” donker om my dreig, ek kan onthou dat dit nie die einde van die wêreld is nie … Dit beteken maar net dit is weer tyd om nie net te leef nie, maar om te leer hoe om te leef; om nie net te glo nie, maar om te léér glo.

Here God, ek neem U nou op u woord dat U van al my trane weet en elkeen van hulle op u tyd sal afdroog.

Here Jesus, dankie vir die belofte dat U my sal vertroos wanneer ek hartseer is. Help my om op my beurt ander mense te troos wat hartseer is, soos U dit vir my doen.

Here Jesus, ek hou vas aan die belofte dat U eendag my aardse hartseer in hemelse blydskap sal verander.

Hemelse Vader, daar is baie dae dat ek wens dat ek iemand by my kon hê; iemand wat my sal vashou en troos.

Dankie dat U altyd daar is vir my, dat u troos my tot rus bring in tye van onrus; dat U u Gees gestuur het om vir altyd by my te bly, dié Trooster wat my nooit sal verlaat nie, maar wat elke oomblik vir my onderneem.

Dankie vir die belofte dat U dié mense wat treur, self sal vertroos. Here, leer my om ook ’n trooster vir ander te wees, om my swaarkry as voorbeeld te gebruik en ander mense te vertel hoe U my getroos het.

Ek weet, Here, dat U my nie net troos omdat ek so ’n groot behoefte aan u troos het nie, maar sodat ek weer op my beurt ander mense kan aanraak soos wat U my aangeraak het.

Hemelse Vader, dankie dat U my deur en deur ken – dat U ook van my hartseer bewus is. Here, ek bid dat U dit sal gebruik om my nader aan U te trek, dat ek dit selfs sal regkry om bly te wees oor die hartseer omdat ek weet dat U dit gebruik om my ’n geloofseksamen te laat skryf. Ek loof U dat U my volkome kan vertroos omdat ek weet dat hierdie hartseer maar net ’n kort rukkie aanhou as ek dit vergelyk met die ewige heerlikheid wat vir my wag by U.

Hemelse Vader, help my om hierdie hartseer in my lewe te aanvaar en te verwerk met die genade wat van U kom. Help my ook om u hand in hierdie hartseer raak te sien – nie omdat dit u wil was nie, maar omdat U dit net toelaat sodat ek geestelik sterker en meer weerbaar kan word, en uiteindelik meer van u vreugde kan bevat. Maak die onrus in my hart stil, Here, en gee my u vrede. Dankie dat ek seker weet dat u arms om my is in hierdie krisis.

Hemelse Vader, Job het soveel meer as ek verloor: al sy besittings en ál sy kinders – Here, ek weet nie hoe ’n mens so iets kan verwerk en steeds bely dat jy God se Naam prys nie. Maak my bereid om soos Job nie net die goeie van U te aanvaar nie, maar ook die slegte, nie net blydskap en vrede nie, maar ook die hartseer en pyn. Maak my ook bereid om die werklikheid van my verlies in die oë te kyk en met u hulp aan te gaan met die lewe. Dankie vir die wete dat U magtiger is as my omstandighede.

Here, ek besef dat hartseer tot my beswil kan wees as dit my nader aan U bring. Gee dat ek u sorg in my seerkry sal raaksien.

Hemelse Vader, op die oomblik voel dit vir my asof my blydskap vir altyd weg is, asof ek nooit weer die borrelende vreugde van u teenwoordigheid in my lewe sal ervaar nie.

Baie dankie vir die versekering dat dit nie so is nie, dat hartseer nooit die laaste woord spreek vir u kinders nie, dat U my droefheid weer in vreugde sal verander, dat U vir my uitkoms sal gee, dat U my weer bly sal maak.

Ek wil nou terugkom na U toe, Here.

Vergewe my sonde, en help my om U weer met oorgawe te dien.

Ek weet, al kan ek dit nog nie voel nie, dat dit juis hierdie swaarkry is wat aan my vreugde in die toekoms ’n ekstra dimensie sal verleen.

Leer my om die vreugde meer intens te beleef juis omdat ek swaar gekry het.

Ek wil nou my rouklere omruil vir u feesgewaad.

Hemelse Vader, vir die eerste keer leer ek nou eerstehands die donkerte van depressie ken.

Vir my voel dit asof ek op ’n pad sonder ’n lig loop, asof U my wegstoot wanneer ek na U roep, asof U doof is vir my stem, asof U weier om my gebede te verhoor.

Dankie dat my geloof nie in my gevoel geanker is nie, maar dat ek seker mag weet: Al kan ek dit op die oomblik nog nie so ervaar nie, is U steeds lief vir my, sal U my nooit alleen laat nie.

U wat self die Lig is, sal die donkerte van die oomblik laat verdwyn en dit weer lig maak in my lewe.

Dankie dat ek hier in die donkerte steeds op U kan vertrou, dat ek U kan vra om my te lei en my te leer dat U steeds in beheer bly.

Ek hou vas aan u beloftes al kan ek nie ’n tree voor my sien nie.

Here Jesus, soos die psalmdigter is ek vandag gedaan van verdriet.

Dankie vir die versekering dat U van my trane weet, dat dit nooit u wil is dat ek moet ly nie, al kan ek dit verwag omdat ek in ’n onvolmaakte, sondige wêreld leef.

Leer my, Here, dat ek al hierdie ellendes nie hóéf te verstaan nie, dat u gedagtes soveel hoër is as myne en dat ek my twyfel by U kan laat omdat U die heel beste weet.

Dankie dat U my nooit alleen sal laat wanneer ek hartseer is nie, dat ek juis dán in die kring van u arms staan, dat ek kan staatmaak op u troos omdat ek weet dat U in die hemel is en vir my by God intree.

Dankie vir die versekering dat wanneer ek hartseer is, U reeds van my seerkry weet en na my gebede luister.

Here, hierdie seerkry en swaarkry dreig weer eens, soos so baiekeer in die verlede, om my voete onder my uit te slaan en u gesig vir my te verberg.

Ek wil nou hierdie seerkry voor U blootlê, Here – ek kan dit nie verwerk of verstaan nie, ek kan maar net op U bly vertrou, omdat ek al so baiekeer in die verlede ervaar het dat U die heel beste weet, dat elke stuk pyn iewers in u meesterplan ’n plek het.

Dankie dat ek ook hier in die donker aan u hand mag vasklou – dié hand wat keer op keer my val stuit.

Dankie vir u troue liefde waarop ek kan staatmaak, dié liefde wat my in alle omstandighede regop hou.

Dankie vir die wete dat dit juis deur seerkry is dat ek u liefdevolle ondersteuning – waarsonder ek nie kan leef nie – elke dag in my lewe ervaar.

Here, vandag is ek kwaad vir U en teleurgesteld in U. Dankie dat ek nie daaroor hoef te swyg nie, dat ek dit maar reguit vir U kan sê. Soos die psalmdigter roep ek sonder ophou na U, maar ek kry geen troos of antwoorde nie. U laat my ook wakker lê, ontsteld en sprakeloos. Ek kan regtig nie verstaan waarom U hierdie dinge wat my so seer maak, in my lewe laat gebeur nie. Ek kan dit ook nie laat rym met u liefde vir my nie. Ek wil hierdie onvergenoegdheid met U erken en daardeur werk. In my nood wil ek soos die psalmdigter by U hulp soek. Dit voel ook vir my asof U nie meer soos voorheen is nie. Maar, Here, ek wil tog nog aan U vashou omdat U my altyd in die verlede gehelp het. Gee dat hierdie seerkry-ervaring my intenser na U sal laat luister, my net nader aan U sal bring. Dankie vir die versekering dat U steeds dieselfde liefdevolle God van voorheen is, al voél dit nie nou vir my so nie. Versterk my klein geloof en help my om al hoe vaster op u beloftes te vertrou en op u wonderdade van die verlede te bly fokus. Dankie dat U steeds my Herder bly wat my uiteindelik veilig deur die pyn en swaarkry sal lei tot by die Vaderhuis.

Het U my vergeet, Here? Waarom antwoord U nie as ek roep nie? U weet mos van my pyn, van die seer wat so groot is dat ek dit nie meer kan binnehou nie.

Die trane waarteen ek so hard veg, is maar net simbole van ’n pynfontein wat oorloop.

Ek draai my gesig weg van mense.

Ek kan tog nie my hartklop, my bloedstroom, my senupunte aan die wêreld blootstel nie.

Ek kan tog nie my pyn uitstal vir ’n wêreld wat alreeds genoeg het van pyn nie.

Almal het pyn, ek weet dis deel van my en al die ander se menswees om seer te kry.

Maar, Here, my seer van vandag is so onuitstaanbaar groot. Hierdie stukkie donker laat my voete wankel.

Ek hoor ander mense wat vertel hoe U tog antwoord, op u tyd en u manier. En ek hoor mense sê die grootste wonder is om aan die ander kant van die donker pad te ontdek dat God jou hartklop en jou senupunte en jou bloedstroom ken.

En dat jy skielik ontdek dat jy deur jou pynroete God se hartklop beter leer ken.

Dankie, Here, vir mense wat my help om u hartklop te ontdek. Dankie vir mense wat my so vashou dat ek u arms om my kan voel.

Ek glo, Here. Help my waar ek nog ongelowig is.

Eensaamheid en moedeloosheid

Eensaamheid

Hemelse Vader, ek weet nou dat alleen en eensaam nie noodwendig sinonieme is nie, dat ek die eensaamheid opsetlik kan opsoek, juis omdat ek my hart ’n slag wil ondersoek – omdat ek weer ’n slag my prioriteite wil regkry, en wil nadink oor dinge wat ek gelees het en dinge wat ek by ander geleer het.

Dankie dat hierdie tye van stilte my nader aan U bring, dat ek dan U stem heel duidelik hoor. Dankie dat ek seker weet dat U in hierdie tye van alleenheid digby my is, dat U my met u liefde omvou en van u trou en goedheid verseker. Ek loof U vir u belofte dat U my nooit sal begewe of verlaat nie!

Hemelse Vader, dis vir my ’n belangrike ontdekking hierdie: dat die eensaamheid soms selfs goed vir my kan wees omdat ek dan meer tyd kry om na u stem te luister. Dankie dat U met my praat elke keer wanneer ek met my Bybel besig raak – dat U my van u troue liefde vir my verseker in die beloftes wat in u Woord vir my opgeteken is.

Help my om die ekstra ure van vandag te vul met u teenwoordigheid, om die waarhede in u Woord my eie te maak, om na U te luister en met U te praat omdat ek weet: U is nooit te besig vir my nie. U is te alle tye beskikbaar omdat U nooit slaap of sluimer nie.

Hemelse Vader, ek loof U vir die wonder dat U elke dag by my is, dat U nooit ver kán wees nie omdat U deur u Gees in my woon sodat ek nooit een oomblik van die dag eensaam hoef te wees nie. Dankie dat U wat so groot en almagtig is oor my bly is, dat daar by U oplossings vir al my probleme is omdat U inderdaad vir my ’n held is wat verlossing skenk.

Hemelse Vader, U weet alles van my af.

U weet dat ek soms eensaam voel, al is ek tussen mense, dat dit dan vir my voel asof niemand regtig meer vir my omgee nie. Help my om dié tye wanneer ek alleen is en moedeloos voel, konstruktief te gebruik om nader aan u te kom en as mens te groei en te ontwikkel.

Dankie vir die ekstra tyd wat ek deesdae het om met U te praat en om u Woord te bestudeer.

Here, ek wil bid vir dié mense wat werklik eensaam is: hulle wat al hul dierbares verloor het; hulle wie se kinders hulle oënskynlik vergeet het; hulle wat min of geen besoek ontvang nie; hulle in tehuise of hospitale wat heeldag op hul eie geselskap aangewys is …

Here, wil U ook vir hulle in ’n huisgesin laat woon.

Wil U hulle bewus maak van U liefde vir hulle.

Maak my gewillig om deur u gebruik te word om hul eensaamheid te verlig.

Hemelse Vader, U weet dat ek so baiekeer in myself gekeer is, dat ek myself opsetlik toesluit – ook vir dié mense wat my liefhet – dat ek mure oprig en agter maskers skuil.

Here, ek bid dat U my die vermoë sal gee om die mure weer af te breek, om myself oop te maak vir ander, om my gedagtes en drome openhartig met hulle te deel sonder die vrees dat hulle my sal seermaak.

Dankie vir mense wat vir my omgee. Dankie, veral, vir u onvoorwaardelike liefde vir my.

Here Jesus, toe U op die aarde was, het U dikwels die afsondering opgesoek om alleen op ’n eensame plek met u Vader te gaan praat.

Help my om my eensaamheid ook so sinvol te gebruik – om my Vader in die hemel op te soek in my alleentye.

Here Jesus, ek weet goed dat U by my is, dat U deur u Heilige Gees ín my woon.

Hoekom voel ek dan vandag so eensaam en verlate?

Hoekom voel dit vir my asof ek nutteloos geword het, asof niemand my meer liefhet of my nodig het nie?

Vergewe my asseblief vir hierdie negatiewe gedagtes.

Eintlik weet ek dat U elke oomblik by my is, dat U my nooit alleen sal laat óf in die steek sal laat nie – ook al kan ek vandag nie u teenwoordigheid aanvoel nie.

Omvou my asseblief nou met u liefde op so ’n duidelike manier dat ek u arms om my sal kan voel. Baie dankie vir die versekering dat U met my sal saamstap op hierdie laaste entjie van my lewensreis, en dat U ook aan die einde van hierdie reis by my sal wees wanneer ek in u Vaderhuis aankom waar ek vir altyd by U sal wees.

Here Jesus, is dit dalk die oplossing vir my eensaamheid: dat ek soos U sal leer om te doen wat die Vader sê, dat ek dié dinge sal verkondig wat U my leer in u Woord?

Dankie dat ek mag weet dat U altyd by my is, dat U my nooit alleen sal laat nie. Maak my asseblief gehoorsaam aan elkeen van u gebooie sodat ek u teenwoordigheid elke dag bewustelik in my lewe sal ervaar.

Here Jesus, omdat Uself ’n mens was soos ek, ken U die eensaamheid. Al u dissipels het U in die steek gelaat juis toe U hulle die heel nodigste gehad het.

In Getsemane het U ook ervaar dat u vriende nie eens ’n uur lank saam met U kon wakker bly nie.

Aan die kruis was U selfs van God verlate sodat ék nooit weer sonder Hom hoef te wees nie.

Baie dankie vir die troos wat hierdie wete vir my gee juis noudat ek self so allenig voel.

Dankie vir die helder sekerheid dat God deur sy Heilige Gees in my woon sodat ek nooit weer alleen hoef te wees nie.

Here my God, dit is vir my onbegryplik dat U my só ken van voor my geboorte af.

So deeglik dat U selfs weet wat ek dink en hoe ek voel op ’n bepaalde tydstip.

U weet dat ek soms voor ander ’n front voorhou. Dankie dat ek by U altyd net myself kan wees juis omdat U my so goed ken.

Here, dié wete gee my troos en krag wanneer ek eensaam is en wanneer ek ver van U voel. Help my om elke dag uit dankbaarheid daarvoor heiliger te leef.

Here, vandag voel ek eensaam en alleen. Tog weet ek dat U elke oomblik in my lewe teenwoordig is omdat U deur u Heilige Gees in my woon. Maak van my ’n brugbouer na ander eensame mense, en vergewe asseblief my sonde.

Here, ek wil saam met die psalmdigter ’n lied sing vir U! Dankie dat daar in u woordeboek nie so ’n woord soos eensaamheid is nie omdat U eensame mense in ’n huisgesin laat woon.

Ek bid dat U my sal help om, noudat ek alleen is, steeds my lewe met inhoud te vul, om ander te dien, om mense om my raak te sien, vir hulle om te gee, hulle te help en lief te hê.

Help my om steeds met vreugde mens te wees, om die mooi dinge om my raak te sien, en om my boeke en musiek met oorgawe te geniet. Verseker my asseblief weer eens dat ek nie alleen is nie, maar deel uitmaak van u huisgesin.

Moedeloosheid

Hemelse Vader, daar kom soms beproewings oor my pad wat ek maar swaar verwerk en meestal glad nie kan beryp nie. Dit voel vir my asof dié probleme my verhinder om U te dien en voluit vir U te werk.

Dankie dat ek kan weet ek kan U ook dien deur in my omstandighede te berus; deur stil te word en op U te wag.

Help my om soos Milton en Beethoven my allerbeste te lewer juis wanneer dit vir my skynbaar onmoontlik is.

Dankie vir die versekering dat ek dit sal regkry met u hulp omdat niks vir U onmoontlik is nie.

Hemelse Vader, U weet dat my moed baiekeer min word, dat ek soms net nie langer kans sien om uit te hou en aan te hou nie. Ek bid dat U my sal help om vas te byt ten spyte van die negatiewe dinge waarmee ek op die oomblik worstel.

Help my om moed te hou, om vas op U te vertrou, om dié dinge wat ek nie kan verander nie te aanvaar met die seker wete dat U nie my las swaarder sal maak as wat ek en U saam sal kan hanteer nie.

Baie dankie vir u wonderwerkende krag wat U steeds daagliks tot my beskikking stel, en vir die belofte dat die hemel ééndag, wanneer al my swaarkry vir altyd verby sal wees, op my sal wag.

Hemelse Vader, dankie vir die versekering dat U my vashou, dat ek naby U mag bly, ook noudat ek oud en alleen is. U weet, Here, dat dit soms vir my voel asof ek nie veel beteken nie, asof niemand my regtig meer nodig het nie.

Dankie dat u Woord my belowe dat niks en niemand my ooit uit u hand kan ruk nie, maar dat ek aan U sal behoort vir altyd.

Hemelse Vader, ek weet dit behoort nie so te wees nie, maar vandag is ek sielsmoedeloos.

Dit voel vir my asof ek nie een tree verder kan loop nie, asof alles vir my te veel geword het.

Gee vir my meer geloof, Here, en die vermoë om opnuut seker te wees van dié dinge waarop ek hoop, om oortuig te wees van dié dinge wat ek nog nie sien nie.

Ek bid dat U my sal help om weg te kyk van al die probleme wat my lewe so donker maak, en weer ’n slag na u kruis te kyk.

Dankie dat u kruis steeds die vermoë het om vir my vergesigte oop te sluit, om my weer nuwe hoop te gee wanneer my hoop min raak.

Ek loof U vir die versekering dat my swaarkry nou, eendag vir my sal uitloop op ’n heerlikheid wat alles oortref en ewig sal bly.

Hemelse Vader, U ken my deur en deur, daar is absoluut niks wat ek vir U kan wegsteek nie – dus weet U ook baie goed dat ek die laaste tyd moedeloos en sonder hoop deur my dae sukkel.

Verseker my net weer dat my negatiewe omstandighede van die oomblik my nie van u liefde kan wegtrek nie.

Vergewe my dat ek oud en nutteloos voel, en dat ek gaandeweg selfs my hoop op U verloor het. Ek loof U dat u liefde en ontferming vir my eindeloos is, dat ek dit elke môre op ’n nuwe manier mag ervaar en dat U absoluut getrou bly.

Help my om hierdie boodskap van hoop oor te dra aan ander mense wat moedeloos is.

Here, ek is jammer dat ek vandag al weer onder die besembos sit, dat ek, soos Elia, ook vir U wil kom sê:

“Nou is dit genoeg, Here!”

Ek kom bely my moedeloosheid, neerslagtigheid en futloosheid, die begeerte om my in ander omstandighede te bevind. Vergewe my asseblief, Here; ek besef dat dit ’n mosie van wantroue in U is.

Help my onder die besembos uit, versterk my en gee my nuwe krag soos U met Elia gedoen het.

Dankie dat ek – selfs hier onder die besembos – tog weet dat U die God van wonders is.

Versterk my geloof.

Stuur ook vir my die sagte wind van u teenwoordigheid sodat ek opnuut u lig en vreugde in my lewe kan ervaar.

Here, vandag kan ek my so met Jeremia vereenselwig.

Vir my voel dit ook asof dit klaar is met my en met my hoop op U, asof ek nie langer op U kan reken nie.

Dankie dat ek weet dat dit tog nie waar kan wees nie.

Ek bely dat U my lewe is en dat ek steeds op U bly hoop.

Help my om U beter te leer ken om vas te hou aan u beloftes, beloftes van ’n onverganklike erfenis wat U vir my bewaar.

Here Jesus, dankie dat U my hoop op die heerlikheid is, dat U al my sondes reeds vergewe het deur u soenverdienste aan die kruis, dat U dit vir my moontlik maak om eendag vir altyd te lewe.

Ek bid nou dat U my deur my geloof vol sal maak van die vreugde en vrede wat van U af kom sodat my hoop al hoe sterker kan word deur die krag van u Heilige Gees.

Huwelik

Hemelse Vader, ek wil U loof vir u gawe van die huwelik. Ek weet dat dit ’n instelling is wat van U af kom, daarom bid ek dat U my en my man vir altyd getrou aan mekaar sal maak.

Help ons om mekaar in alles by te staan, gewillig te wees om ons foute te erken, mekaar te bemoedig en altyd daar te wees vir mekaar.

Gee dat ons mekaar onvoorwaardelik sal aanvaar en liefhê, dat ons mekaar nie sal verwond met ons woorde nie, mekaar sal vergewe en absoluut betroubaar sal wees.

Dankie vir my maat se goeie eienskappe en dat ons die romanse tussen ons kan lewend hou.

Dankie dat ons beste vriende met ware omgeeliefde kan wees en dat ons mekaar aan U kan opdra.

Maak ons ook goeie rentmeesters van U: volwasse verhoudingsvennote wat mekaar sal ondersteun en na mekaar sal luister.

Bewaar ons van versoekings en maak ons gewillig om mekaar in liefde te dien.

Dankie dat U daar is vir ons wanneer die krisisse opduik.

Maak dit dan vir ons moontlik om uit en aan te hou sodat ons egskeiding nooit eens sal oorweeg nie, maar altyd u wil en koninkryk voorop sal stel

in ons huwelik.

Here, baie dankie vir die voorreg om saam te kon oud word.

Om elke dag van ons lewe te kon ondervind dat U ons gedra het, dat U ons liefde vir mekaar laat groei het.

Dankie dat elke dag wat oorbly ons nader aan U bring.

Here Jesus, baie dankie vir die vrede wat U aan u kinders belowe. Ek wil dit nou vir my toe-eien. Help my asseblief om daardie vrede in my huwelik uit te leef, en altyd dankbaar te bly.

Here, ek bid dat U vir my die wysheid sal gee om my man werklik te verstaan; om hom lief te hê met ie en entoesiasme, om absoluut getrou aan hom te wees, en hom daagliks van my bewondering en vertroue te verseker.

Here, help my asseblief om die leiersrol in ons huwelik aan my man oor te laat sodat ons saam na eenheid in ons huwelik kan streef en U eerste in ons huwelik sal stel.

En as daar tye van onvrede kom, vra ek dat U vir ons u vrede sal gee, dat U ons sal help om ons bekommernisse na U te bring en op U te steun in krisistye.

Gee dat ons ons gelukkige huwelik nooit as vanselfsprekend sal beskou nie.

Dankie dat ons ’n sin vir humor deel, dat ons mekaar kan opbou en versterk, en bereid is om mekaar onvoorwaardelik te aanvaar.

Help ons om mekaar aan te spoor tot liefde en goeie dade. Maak ons erkentlik en geduldig teenoor mekaar, gewillig om na mekaar te luister, diplomaties en taktvol in ons omgang met mekaar.

Leer ons om die tyd tot ons beskikking ten beste te gebruik, om net die beste van mekaar te verwag, ons foute te erken en mekaar onvoorwaardelik lief te hê.

Here, baie dankie dat U vir my ’n maat gegee het wat by my pas, iemand wat my kon liefhê, my kon koester en vir my kon sorg.

Dankie vir ’n huwelik wat elke dag ’n fees was – en vir so baie gelukkige jare saam.

Maar, Here, nou is my maat vir altyd weg, en juis omdat ons so gelukkig was, voel dit vir my of ek nie alleen verder kan leef nie – asof ék ook maar liewer wil wees waar hy nou is, veilig in die hemel by U.

Dankie dat U weet van my hartseer en eensaamheid en ook van my opstand teen U.

Dankie vir mense wat my bystaan en ondersteun, dankie vir my kinders wat so baie vir my beteken.

Hou my asseblief daglank digby U, Here, en kom verseker my weereens dat U altyd by my sal wees.

Here, dankie vir ’n sin vir humor wat van U kom. Ek bid dat U my en my man sal help om ons onderonsies met ’n lagsessie te ontlont, maar dat U ons daarvan sal weerhou om ooit vír mekaar te lag.

Here, dankie vir gawes wat ons sáám in u diens en tot u eer kan aanwend. Wys vir ons as huweliksmaats waar U ons in ons gemeente wil gebruik.

Here, dis nie altyd vir my so maklik om my man in alle opsigte eerste te stel nie – U weet dat ek maar ’n sondaar bly! Help my asseblief om onselfsugtig in my huwelik op te tree sodat ek en my man werklik één sal wees.

Here, ek is so geneig om my man te kritiseer eerder as om hom te bewonder en te vertrou. Baie dankie dat U vir my ’n man gegee het wat my vertroue en bewondering verdien. Help my om dit van nou af vryelik vir hom te gee.

Here, my man is dood en ek kan nie daarmee vrede maak nie. Ek bly dink: Hoekom ék, hoekom is my man dood terwyl daar soveel ongelukkige huwelike is.

Daar is so baie nuwe dinge wat ek nou moet leer: om my geldsake te behartig, om alleen te gaan inkopies doen en alleen kerk toe te gaan, om alleen langs die see te gaan stap en alleen teater toe te gaan.

Om alleen by ons gesamentlike vriende te kuier, om alleen te eet en saans alleen te gaan slaap.

Dis so moeilik, Here.

Ek kan hierdie skielike eensaamheid nie hanteer nie.

Dankie vir kosbare herinnerings wat myne bly. Dankie vir die versekering dat U nog by my is, dat U my nooit alleen sal laat nie, maar vir altyd by my sal bly, selfs as dit my beurt raak om deur donker dieptes te gaan.

Kinders

Here, niks het my voorberei op die vreugde wat deur my gespoel het toe ek my baba vir die eerste keer in my arms gehou het nie.

Hoe volmaak het U my kind nie gemaak nie – ek wil laag kniel voor U en u Naam grootmaak!

Here, dankie vir die kinders wat U aan my toevertrou het.

U weet dat ek hulle so liefhet dat ek soms geneig is om aan hulle vas te hou wanneer ek hulle moet toelaat om hul eie lewe te lei.

Help my om te onthou dat my kinders nie aan my behoort nie, maar net aan my geleen is en hul eie lewe het.

Vergewe my dat ek dikwels so op die materiële konsentreer dat ek vergeet van die dinge met ewigheidswaarde.

Leer my wat werklik belangrik is sodat ek dit by hulle sal inskerp en dit onlosmaaklik deel van hul lewe sal word.

Maak my kinders volwasse mense vir U.

Here, dankie vir my kinders. Gee asseblief vir my die wysheid om hul gawes van kleins af te stimuleer sodat u plan vir hul lewe uitgevoer kan word.

Here, dis besonders dat my kinders elkeen nóg ’n kind in die huis ingebring het.

Gee dat ek my nuwe kinders opreg sal liefhê, dat ek hulle nie sal kritiseer of inmeng met hul sake nie, en dat ek hulle sal aanvaar net soos hulle is.

Here, dis nie vir my lekker om my kinders so streng te dissiplineer nie, maar ek weet dat dit u wil is dat ek vir hulle riglyne moet neerlê sodat hulle kan weet hoe om die lewe met selfvertroue aan te durf.

Lei my asseblief hierin.

Here, dit maak my bang dat my kinders my voorbeeld sal wil volg.

Help my om só te leef dat hulle dit met vertroue sal kan doen, en dat hulle aan my optrede sal kan sien dat ek U dien en liefhet.

Here, ek bid dat U my kinders van verkeerde vriende en verkeerde gewoontes sal vrywaar. Stuur asseblief vir hulle vriende wat U liefhet en ken.

Here, ek is ook skuldig daaraan dat ek my kinders materialisties grootmaak. Vergewe my en help my om die regte waardes by hulle te kweek.

Here, ek loof U dat ek my kinders aan U kan toevertrou. Beskerm hulle asseblief waar hulle ook al mag gaan sodat hulle in alle omstandighede veilig sal wees. Ek vra dit in Jesus se Naam.

Here, help my asseblief om my kinders met die nodige dissipline groot te maak sodat hulle sal weet dat ek hulle werklik liefhet.

Here, maak my ’n ouer wat veiligheid en krag uitstraal sodat my kind geborge kan voel; ’n ouer wat vergewe en liefhet en aanvaar, sodat my kind u liefde en vergifnis sal aanvaar; ’n ouer wat ’n geestelike stempel op my kind afdruk en hom of haar vir U grootmaak.

Here, soms sukkel ek so om my kinders by die kerk te kry! Help my om vir hulle ’n voorbeeld te wees en hulle te wys hoe vervullend kerkbywoning vir my persoonlik is.

Here, vandag kom vra ek vir die wysheid om my kinders reg groot te maak. Help my asseblief om die foute wat ek met hulle begaan het, reg te stel.

Here, wys my asseblief hoe om my kinders vir U groot te maak deur hulle op die regte manier te dissiplineer en hulle te straf as dit nodig is.

Hemelse Vader, baie dankie vir my pragtige kinders. Vergewe my asseblief as ek te veel van hulle verwag; as ek prestasies van hulle verwag wat ekself graag wou bereik, maar nie kon nie; as ek deur hul suksesse aan my eie selfbeeld wil bou.

Gee my die wysheid om my kinders te aanvaar net soos hulle is.

Here, help my om altyd te onthou dat my kinders ’n geskenk van U is; dat hulle eintlik aan U behoort; dat U hulle net aan my geleen het om hulle vir U groot te maak.

Help my om my verantwoordelikhede teenoor my kinders na te kom.

Gee dat ek die belofte wat ek met hul doop afgelê het, gestand sal doen: dat ek hulle van kleins af van U sal vertel, en hulle sal leer dat om U te ken baie belangriker is as die grootste prestasie.

Gee my elke dag die krag en die wysheid om ’n ouer-vir-U te wees.

Vader, dankie vir die voorreg om ma te kan wees!

Baie dankie vir my kinders, dankie dat hulle U ken.

Ek bid dat U u seën oor hulle sal uitstort en dat hulle vir die res van hul lewe lewende getuies van U sal wees.

Vader, dis so lekker om ’n dogter te hê – ’n stukkie van myself met wie ek vroumensdinge kan deel.

Gee my asseblief die nodige wysheid om haar vir U groot te maak, en bewaar haar tog teen versoekings wat oor haar pad mag kom.

Hemelse Vader, ek loof U vir die kinders wat U vir my gegee het – maar Here, daar is tye wanneer hulle my so onwetend seermaak: Dae wanneer ek tevergeefs wag dat hulle my sal bel, weke wat omgaan sonder dat hulle kom kuier, en as hulle wel kom, bly hulle so ’n kort rukkie, Here.

Vergewe my dat ek waarskynlik te veel van my kinders verwag.

Ek weet hulle is baie besig en dat hulle werklik baie min tyd het.

Help my om nie al hul liefde en tyd vir myself te wil opeis en bitter te raak as ek dit nie regkry nie.

Ek is jammer as ek soms vergelykings tref en dié dinge bly oprakel wat ek alles in die verlede vir hulle gedoen het. Leer my om tevrede te wees met die hoeveelheid liefde en tyd wat ek wel van hulle ontvang, en maak my liefde vir hulle al hoe oorvloediger.

Dankie dat ek tydig en ontydig u seën op hulle kan afbid en kan vra dat U vir elkeen van hulle ’n stralende getuie van U sal maak.

Vader, ek bid vir my kinders. Help my om hulle te leer dat geld en goed minder belangrik is. Wys my hoe ek hulle kan inspireer om kerk toe te gaan, hoe ek die foute wat ek met hulle gemaak het kan regstel, hoe ek hulle kan help om hul volle potensiaal te bereik en hoe ek sinvol met hulle kan kommunikeer. Gee vir my die wysheid om hul strikvrae te beantwoord en bewaar hulle elke oomblik van die dag.

Ag, Here, my hele lewe het in ’n oomblik verander. Dis alles so anders as tevore – niks is meer dieselfde nie, niks sal ooit weer dieselfde wees nie.

My kind is dood – dié feit moet ek erken en dit hardop vir myself sê omdat ek dit nie wíl glo nie. Die kind wat U vir my gegee het, wat so ’n sonstraal in ons lewe was, is vir altyd weg.

Ek sal nooit weer daardie vrolike stem hoor, saam met my kind gaan inkopies doen of heerlik saam my kind kan lag nie.

Here, dit voel asof ’n stuk van myself vir altyd weggeruk is, asof die grond onder my voete verbrokkel en ek niks meer het om aan vas te hou nie.

Ek glo tog in U, ek wéét dat U my liefhet – dis net dat dit nie vir my op die oomblik ’n werklikheid wil word nie, dat alles so nagdonker om my bly, dat die wanhoop my nie wil laat los nie.

Daar is so baie vrae waarop ek nie antwoorde kan kry nie. Hoe sal ons dit tog regkry om sonder ons kind voort te gaan? Hou my asseblief styf vas, Here. Vertroos U my. Wys my hoe om weer bly te wees, hoe om in u wil te berus.

Here, my pragtige kind is dood. Ek is ook dood hier binne. Maar Ú is die opstanding en die lewe, en dit troos tog dat ek seker weet dat sy by U is en dat ek haar ééndag weer sal sien.

Oudword

Ag, Here, ek vergeet al hoe meer hoe ouer ek word – name en gesigte, datums en afsprake.

En dit stem my soms moedeloos.

Dankie dat ek te midde van al die vergeetagtigheid wat by die dag erger word, weet dat U my nooit kan vergeet nie.

Ek loof U dat U my by die naam ken, dat, selfs al sou die onmoontlike gebeur dat ’n ma haar baba vergeet, U my steeds sal onthou omdat U u Seun gestuur het om in my plek te sterf; omdat my naam in u handpalm gegraveer is, U my liefhet en ek vir U kosbaar is.

Here, dis wonderlik dat U my onthou, maar van elkeen van my dosyne sondes vergeet sodra ek hulle voor U bely het.

Dankie ook vir die nuwe naam wat U eendag in die hemel aan my sal toewys.

Hemelse Vader, baie dankie dat ek deur die loop van my lewe soveel drome kon hê – en dat U dit vir my moontlik gemaak het om baie van hulle te verwesenlik. Vergewe my dat dit my dikwels mismoedig en depressief gemaak het as my verwagtings misluk en my drome nie waar geword het nie.

Dankie dat ek nog mag droom hoewel ek nie meer jonk is nie.

Hou my entoesiasties en help my om aan my drome vas te hou.

Maak my bereid om alles in te sit én te waag sodat hulle verwesenlik kan word.

Ek weet nou dat drome ’n mens jonk hou, en daarom wil ek nog aanhou droom, aanhou om – altyd met u hulp – my wense en ideale te verwesenlik.

Leer my dat U soms my drome anders interpreteer as ekself – en help my om u vervulling van my drome te aanvaar as die beste opsie, al mag dit dalk van my oorspronklike droom verskil.

Dankie vir die belofte in u Woord dat U die droom waar maak, die wens vervul van dié persoon wat u Naam eer. (Ps 61:6)

Hemelse Vader, vergewe my asseblief dat ek so sukkel om ten goede te verander en so geneig is om teen die negatiewe dinge in my lewe te bly vaskyk. Gee vir my ’n nuwe perspektief op u liefde vir my.

Maak van my ’n wonder vir baie omdat ek U ken sodat die mense om my sal kan sien dat ek – ten spyte van my ouderdom – nog fris en lewenskragtig is en steeds ’n positiewe bydrae maak op die plek waar ek bly.

Help my om elke dag geestelik te groei en sterker te word, ook al word my liggaam stelselmatig deur die ouderdom afgetakel.

Maak my verdraagsaam teenoor ander en gewillig om “by te bly”.

Vernuwe asseblief my innerlike sodat ek elke dag nog nader aan U sal leef dat U ’n steeds groter rol in my lewe kan speel.

Ek wil op elke plek waar ek kom, getuig van dié wonderlike dinge wat U vir my doen.

Maak my ’n kragtige getuie van U.

Hemelse Vader, baie dankie vir die skatkis van herinnerings wat ek sonder moeite kan opdiep wanneer ek aan die verlede dink.

Dankie vir al die blomme op my lewenspad wat ek nie verdien het nie.

Dankie vir soveel mense wat ek kon liefhê en wat my liefgehad en my lewe oneindig verryk het.

Dankie vir dosyne liefdesdade wat ek kon ervaar deur die loop van my lewe.

En dankie, Here, dat dit nog nie te laat is om aan nuwe, mooi herinnerings te begin bou nie.

Help my asseblief om fyn op te let na dinge wat ek vir ander kan doen om hulle gelukkig te maak – dinge wat in die toekoms vir hulle mooi herinnerings kan word.

Ek loof U vir al die wonderlike herinnerings van dié kere toe U vir my onderneem het, my bewaar het, my bewus gemaak het van u onvoorwaardelike liefde vir my.

Saam met die psalmdigter wil ek vir U kom sê: “Here, my Here, hoe wonderbaar is u Naam op die ganse aarde!”

Hemelse Vader, dankie dat ek in U mag glo. Dat ek daarom seker weet dat die dood nooit ’n finale skeiding is nie omdat ek my dierbares weer eendag sal sien. U weet hoe hartseer ek is, Here, maar daardie hartseer is tog draaglik omdat ek weet dat hulle op die oomblik baie beter daaraan toe is as ek – omdat hulle by U in die hemel is. Dankie dat ek hartseer mag wees terwyl die hoop tog helder in my brand – omdat hierdie skeiding binnekort opgehef sal word.

Hemelse Vader, dankie vir die voorreg wat ek het om op hierdie tydstip van my lewe wanneer ek nie meer alles kan doen waaraan ek gewoond was nie, steeds ’n stralende getuie van U te kan wees. Gee vir my die geleentheid en die regte woorde waarmee ek vir my kinders en kleinkinders van U ingryping in my lewensgeskiedenis kan vertel. Ek bid dat U my sal help dat my getuienis nooit net lippetaal sal wees nie, maar dat ek dit elke dag fisiek sal uitleef. Help my ook om só te leef dat ek dié mense na aan my jaloers sal maak, dat ek hulle sal inspireer om U lief te hê, te volg en te gehoorsaam omdat U in die verlede so goed was vir my. Dankie dat die feit dat ek nie meer so sterk soos voorheen is nie my ’n nog beter getuie van U maak omdat ek my getuienis kan gee uit die krag wat U my gee.

Hemelse Vader, dis ’n wonderlike gedagte dat Christene elke jaar jonger word omdat elke jaar van ons lewe ons ’n bietjie nader aan ons hemelse bestemming bring.

U weet dat daar heel waarskynlik nie meer baie jare vir my oor is nie.

Gee dat ek dit sal regkry om geduldig te wag, om al die beperkings wat my ouderdom met hom saambring met grasie te aanvaar omdat ek weet dat U elke dag by my is; dat U my nooit sal verlaat nie; dat U my sal dra deur daardie tye wanneer ek nie langer self kan loop nie. Maak dit vir my moontlik om steeds elke dag voluit te leef.

Help my nou om stukkie vir stukkie van my aardse klere ontslae te raak en my hemelse klere aan te trek sodat ek gereed sal wees wanneer U my kom haal.

Hemelse Vader, ek ervaar daagliks dat my liggaamskragte afneem – dat ek nie meer so goed kan hoor of sien soos voorheen nie, maar dat my vrese by die dag toeneem.

Dankie vir die ongelooflike teenstrydigheid wat ek in my lewe kon ontdek: U kinders kan toeneem in krag hoe ouer hulle word, en tot in hul ouderdom fris en lewenskragtig bly.

Here, ek loof U vir u wonderwerkende krag wat U tot my beskikking stel, juis nou wanneer my krag min word.

Ek loof U ook vir die belofte dat ek, soos ek ouer word, al hoe meer vrug vir U kan dra.

Help my asseblief om elke dag die vrug van u Heilige Gees in my lewe te vertoon.

Gee vir my u liefde en vreugde, u vrede en geduld.

Maak my vriendelik en goedhartig, getrou en nederig en gee aan my selfbeheersing.

Dankie vir die wonder dat u krag in my lewe altyd baie meer verrig as waarvoor ek bid of wat ek dink.

Soos Paulus wil ek die eer daarvoor aan U bring.

Hemelse Vader, ek is jammer dat ek in die laaste tyd so geneig is om terug te sit en niks te doen nie.

Ek besef heel goed dat ek die gawes wat U my gegee het geringskat en hulle boonop vergelyk met dié van mense wat aanskouliker gawes as ek gekry het.

Vergewe my dat ek dikwels oud en moeg en nutteloos voel.

Dankie dat ek tóg gawes en talente van U ontvang het, wat ek steeds vrugbaar in u koninkryk kan gebruik, hoewel ek nie meer jonk is nie.

Help my asseblief om my potensiaal te ontwikkel, om bereid te wees om deur U gebruik te word, om my talente aan U op te dra, om elkeen van my verantwoordelikhede na te kom, en om so besig te bly dat ek nie tyd sal hê om myself te bejammer nie.

Ek weet dat U my wil gebruik op die plek waar ek woon om van die wêreld om my ’n gelukkiger, meer geseënde plek te maak en om die lewe van ander te verryk.

Doen dit, asseblief.

Hemelse Vader, ek loof U vir die wonderlike belofte dat U my elke dag dra; dat U my van my geboortedag af al vashou en dit sal doen tot op dié dag wanneer ek oud en grys is.

Dankie dat u hande my vashou; dat U tot in my ouderdom die Here is; dat U my tot in my grysheid sal dra.

Dankie dat absoluut niks my ooit uit u hand sal kan ruk nie; dat ek my op U kan verlaat wanneer ek nie self verder kan loop nie.

Ek loof U vir die veiligheid en geborgenheid wat ek mag ervaar omdat ek dié God liefhet wat nie net die wêreld nie, maar ook vir my in sy hande koester.

Vergewe my, Here, dat ek al by tye u hand laat los het, en help my om in die vervolg u hand al hoe stywer vas te hou.

Hemelse Vader, hoe ouer ek word, hoe wonderliker word dit vir my om tyd saam met U deur te bring.

Dankie dat ek met U kan praat elke oomblik van die dag as ek eensaam is, elke minuut van die nag wanneer ek nie kan slaap nie.

Dis wonderlik dat ek vir die mense wat ek liefhet mag bid en ook my persoonlike wense aan U bekend kan maak.

Ek weet, Here, dat U altyd daar is as ek U nodig het – ek weet ook dat U elkeen van my gebede beantwoord, al is u antwoorde soms anders as dié wat ek graag wil hê, en al laat U my soms lank wag voordat U antwoord.

Ek loof U dat U, deur die krag wat in U werk, magtig is om oneindig meer te doen as waarvoor ek bid of dink.

Hemelse Vader, U weet dat ek maar skrikkerig vir die dood is, juis omdat niemand dit kan vryspring nie en ook omdat dit so ’n onbekende terrein is.

Dankie dat U vir my die angel uit die dood gehaal het, dat ek vir seker kan weet dat ek, omdat ek in U glo, eendag vir altyd sal leef, al het ek ook gesterf.

Ek weet nou dat die dood net ’n oorstap na U is, Here, dat dit vir my nie die einde van my lewe beteken nie, maar wel die begin van die ewige lewe, dié nuwe lewe by U wanneer ek vir altyd saam met U sal wees.

Neem my vrees vir die dood weg, Here, en leer my om elke dag só te leef dat U my maar môre kan kom haal.

Here Jesus, ek kom bely dat ek die laaste ruk so óúd geword het dat daardie negatiewe eienskappe waarteen ek my lewe lank gestry het, nou skielik die oorhand oor my begin kry.

Vergewe my my onbuigsaamheid, my onwilligheid om verandering te omhels én my weiering om self te verander.

Vergewe ook my buierigheid en koppigheid, my selfsugtigheid en die pessimistiese gedagtes wat ek bly dink.

Verander my, Here!

Maak my bereid om verandering te aanvaar, om self te verander sodat ek al hoe meer soos U kan word. Here, ek wil graag optimisties en vrolik wees, ek wil uitreik na ander en die mooi dinge in die lewe raaksien. Ek wil moedig wees al gaan dit nie goed nie, my sin vir humor te alle tye behou en vas op U vertrou in alle omstandighede sodat mense wat na my kyk vir U sal raaksien.

Maak dit asseblief vir my moontlik.

Here Jesus, U weet dat ek ook dikwels terugverlang na dié tye toe ek jonk en gesond en vol lewenslus en entoesiasme was, toe alles vir my soveel lekkerder en makliker gelyk het as nou.

Ek weet dat ek maar te geneig is om die verlede deur ’n reënboogbril te sien en my blind te hou vir die genade wat U vandag oor my uitstort.

Gee dat ek die mooi en lekker dinge uit die verlede met my sal saamdra as mooi herinnerings sonder om te bly terugverlang daarna en dit met die hede te vergelyk.

Leer my om vandag aan te gryp, om voluit te leef, om my sintuie op te skerp sodat ek die skoonheid om my kan raaksien en deel van my kan maak. Ek wil niks as vanselfsprekend beskou nie, maar die kleinste besonderheid wat die lewe vir my mooi maak, raaksien en waardeer.

Help my om só te leef dat ander mense gelukkiger deur die lewe sal gaan omdat hul lewenspad met myne gekruis het.

Ek vra dit in Jesus se naam.

Here Jesus, vergewe my dat “ek kan nie” woorde geword het wat gans te veel in my woordeskat opduik.

Dankie vir die nuwe insig dat ek alles kan regkry wat ek regtig graag wil doen omdat U vir my die krag daarvoor sal gee.

Daar is so baie dinge wat ek nog graag wil vermag, maar nog nooit die waagmoed gehad het om te probeer nie.

Maak my diensbaar vir ander, Here.

Leer my om die moderne tegnologie te verstaan en selfs daarmee te werk.

Dit lyk vir my so moeilik, maar ek wil graag probeer om dit reg te kry sodat ek “by” kan bly.

Dankie vir my kinders en kleinkinders wat my daarmee kan help sodat my wêreld kan uitbrei, en ek nuwe dinge kan leer en nuwe uitdagings die hoof kan bied.

Maak dit vir my moontlik, asseblief.

Here Jesus, hoe langer ek leef, hoe groter word die klomp foute wat ek in die loop van my lewe begaan het.

En hulle hinder my so baie dat ek sommige nagte wakker lê en wens dat ek my flaters kon regstel.

Wys my asseblief hoe ek dit kan doen – en wanneer ek dié mense wat ek te na gekom het om verskoning gevra het en vir U om vergifnis, help my asseblief om aan te gaan met my lewe en nie op die verlede te bly fokus en by my foute te bly vassteek nie.

Dankie vir die lewenswedloop waarvan ’n groot deel al vir my verby is. Ek is jammer dat ek dit baiekeer so omkyk-omkyk gehardloop het. Maak dit vir my moontlik om van vandag af doelgerig te hardloop, om alles in te span om die wenstreep te bereik sodat ek aan die einde van my lewe daardie prys wat U belowe het, myne kan maak.

Here Jesus, U weet dat ek soms ongeduldig raak as die dae verbygaan en ek steeds hier op aarde moet aanbly – oud, sieklik en vol pyne en ellende.

Vergewe my dat ek so ongeduldig is om “huis toe” te gaan.

Wys my elke dag wat u wil vir my lewe is, en leer my om op die regte manier te wag deur u wil te doen en ander mense lief te hê, tot op dié dag dat U weer sal kom om my te kom haal.

Wys vir my hoe ek alles in gereedheid kan bring vir u koms, hoe ek my sake in orde kan kry.

Help my asseblief om die tydjie wat ek oor het te vul met dié dinge wat vir U belangrik is: Gee vir my u oorvloedige liefde in my lewe, vervang my gejaagdheid met u vrede, en gee dat ek minder sal kla en elke dag sal oorloop van u blydskap.

Here, ek loof U vir die belofte dat U naby my is, dat U my elke dag met u liefde en genade omvou, dat U my nooit alleen sal laat nie, maar elke dag vir my onderneem, my dra en help en lei.

Baie dankie dat niks in die wye wêreld my van u liefde kan skei nie, dat niks en niemand my ooit uit u hand kan ruk nie.

Help my om U in alles om my raak te sien.

Ek eien nou die belofte van u seënende nabyheid in my lewe vir my toe – maak my elke oomblik bewus daarvan.

Bly baie naby my, Here, terwyl die skadu’s besig is om vir my al hoe langer te word en my lewenspad al hoe korter.

Ek weet dat U steeds by my sal wees wanneer my tydjie op aarde verby is, en dat U my persoonlik in die hemel sal verwelkom.

Hemelse Vader, vergewe my asseblief dat ek in die laaste tyd stilletjies begin dink het dat my lewe klaar verby is.

Dankie vir die splinternuwe insig dat die res van my lewe nog voor my lê, hoewel die tyd op aarde vir my min mag raak. Help my asseblief om die tyd wat ek óór het optimaal te benut, om elke dag voluit te leef.

Om nie terug te deins vir nuwe uitdagings nie, maar gewillig te wees om elke dag vordering te maak deur nuwe vaardighede aan te leer, en die geleenthede wat na my kant toe kom aan te gryp, al is ek nie meer so jonk nie – sodat ek tot op dié dag wat U my kom haal geesdriftig sal meedoen aan die simfonie van die lewe.

Here, ek is oud en alleen; dit voel vir my asof my kinders my nie meer liefhet nie omdat hulle so selde by my kom, omdat hul briefies en telefoonoproepe al hoe korter en al hoe minder raak.

Ek wat altyd so besig was, het nou soveel tyd dat ek eintlik nie weet wat om daarmee aan te vang nie.

Ek wil die ekstra tyd tot my beskikking saam met U deurbring, Here.

Ek wil besig raak met u Woord, aandagtig na u stem luister, en in gebed met U praat.

Saam met die psalmdigter wil ek vir U kom vra: Moet my tog nie alleen los noudat my kragte min is nie … Dankie dat U my eensaamheid kom vol maak.

Here, soms is ek skrikkerig om dood te gaan. Dankie vir die gerusstelling dat my ware woonplek, my nuwe begin, in die hemel by U is.

Vader, U weet dat my lewe hier op aarde maar soms bitter moeilik was. Dankie vir die wonderlike belofte dat U reeds vir my ’n plek in die hemel gereed gemaak het sodat ek, wanneer die aardse hoofstuk van my lewe verby is, met my hemelse hoofstuk by U kan begin.

Here, ek kan nie meer wag vir daardie dag wanneer ek vir altyd by U sal wees nie, wanneer U al my trane sal afdroog, al my swaarkry vir altyd sal wegneem, vir my ’n oorwinnaarskroon sal aanbied, en alles vir my nuut en wonderlik sal maak nie.

Help my om die laaste tydjie wat ek op hierdie aarde oor het só te leef dat ek doodseker sal maak dat die hemel eendag myne sal wees.

Dié plek waar ek nooit weer van U geskei sal word nie, waar u heerlikheid my sal verlig en ek vir altyd saam met U sal regeer.

Gebede vir elke vrou is ’n versamelboek van gebede vir vroue. Wat ookal jou ervaring, dié boek bied jou ’n gepaste gebed: of jy nou hartseer is, jou bekommer, eensaam en verlate voel of siek is. Gebede vir elke vrou bevat ook wonderlike gebede oor jou huwelik, oor en vir jou kinders en oor vriendskap. Van groot vreugde tot die diepste hartseer – vind die gebed wat jou gemoed nodig het hier.

Nina Smit is een van Suid-Afrika se gewildste skrywers. Sy is veral bekend vir haar inspirerende boeke vir vroue, maar het ook talle gesogte boeke vir kinders geskryf. Haar jeugboek Net jy en Jesus 1 het die CBSA Beste Publikasie Toekenning in 1997 ontvang. Sy is getroud met Johan, ’n afgetrede predikant en outeur, en die egpaar het drie kinders en ses kleinkinders. Hulle woon in Somerset-Wes.

Gebede vir elke vrou

Lux Verbi, ’n druknaam van NB-Uitgewers, ’n afdeling van Media24 Boeke (Edms) Bpk, Heerengracht 40, Kaapstad 8001 Posbus 551, Kaapstad 8000 www.luxverbi.co.za

Kopiereg © 2015 deur Nina Smit

Alle regte voorbehou.

Geen gedeelte van hierdie elektroniese boek mag sonder die skriftelike verlof van die uitgewer gereproduseer of in enige vorm of deur enige elektroniese of meganiese middel weergegee word nie, hetsy deur fotokopiëring, skyf- of bandopname, of deur enige ander stelsel vir inligtingsbewaring of -ontsluiting.

Teksaanhalings in hierdie publikasie is geneem uit Die Bybel in Afrikaans 1983-vertaling met herformulerings tot en met 1992 © Bybelgenootskap van Suid-Afrika 1983, 1992.

Teksversorging deur Hilette Potgieter Omslag deur Coco Design E-boekontwerp deur Trace Digital Services

Ook beskikbaar in druk: Eerste uitgawe in 2015 ISBN: 978-0-7963-1814-5

Epub-uitgawe: Eerste uitgawe in 2015 ISBN: 978-0-7963-1815-2 (epub)

Mobi-uitgawe: Eerste uitgawe in 2015 ISBN: 978-0-7963-1816-9 (mobi)